Олунньу 8 күнүгэр Д. И. Николаев аатын сүгэр Киирэп ситэтэ суох орто оскуолатыгар «Фашиһы утары охсуспут герой оҕолор» күннэрин бэлиэтээн «Улахан сэрии кыра геройдара» диэн хорсун санааланыы уруогун 7, 8 кылаас оҕолоругар ыыттыбыт. Оҕолор герой пионердар Валя Котик, Марат Казей, Леня Голиков, Зина Портновая геройдуу быһыыларын, ийэ дойдуларыгар бэриниилээхтэрин сөҕөн, кинилэри кэриэстээн 1 мүнүүтэ саҥата суох турдулар. Бэйэлэрин саастыы оҕолор дойдуларын туһугар олохторун да кэрэйбэккэ өстөөхтөрү кытта охсуспут хорсун быһыылара оҕолорго үтүө холобур буолуо.

Итини таһынан олунньу — тыл ыйа буоларын чэрчитинэн Киирэптээҕи оҕо уһуйааныгар «Сахам сайдан тылынан» диэн оҕолорго сахалыы кинигэлэри билиһиннэрдим уонна Сэмэн Тумат «Тэбиэн уонна таба» остуоруйатын кэпсээн иһитиннэрдим. Уһуйаан иһинэн төрөөбүт тылы таптыырга, ытыктыырга ыытыллар оҕону сайыннарар үлэ иитэр — үөрэтэр сыала — соруга олус улахан.

Марха улууһа төрүттэммитэ 200 сылыгар аналлаах олохтоох оскуола 5, 6 кылаастарын оҕолоругар «Төрөөбүт алааскын эн таптаа» диэн патриотическай уруок буолла. Уруок сыалынан төрөөбүт дойдуга, түөлбэҕэ тапталы, киэн туттууну иҥэрии буолар. Оҕолор төрөөбүт кыраайдарын историятын кытта билистилэр, ийэ дойдуга анаммыт хоһооннору дорҕоонноохтук аахтылар, «Төрөөбүт кыраайгын төһө билэҕин» диэн тургутукка эппиэттээтилэр. Ийэ дойдуларыгар бэриниилээх, үтүө дьон буола тахсалларыгар бүгүҥҥү уруокпут туһуланна.

Бибилэтиэкэр Николаева А. И.