Бүгүн, олунньу 12 күнүгэр Е. К. Федоров аатынан Хорула орто оскуолатыгар сарсыардаттан күргүөмнээх тэрээһинтэн саҕаланна. Сахабыт тылын суругун-бичигин күнүгэр анаан оскуола оҕолоругар өрөгөйдөөх линейка ыытылынна. Сахабыт сирин өрөгөй ырыатын сүһүөхпүтүгэр туран иһиттибит. Былааҕы күөрэччи көтөҕөр чиэһи 5-с кылаас үөрэнээччитэ Степанова Оливияҕа тигистэ. Оливия 13-с төгүлүн ыытыллар «Как прекрасен этот мир!» Москва куорат үрдүк үөрэҕин кыһата ыытар заочнай күрэҕин кыайыылааҕа. А. С. Пушкин хоһоонун дорҕоонноохтук ааҕыыга сир шаарын араас муннугуттан кыттыбыттарыттан биһиги кыыспыт кыайбыта олус үөрүүлээх. И. С. Жараев аатынан модельнай библиотека аатыттан сэбиэдиссэй Андросова Л. И. бу күн үрдүк суолтатын, Семен Андреевич Новгородов оҥорбут сүдү үлэтин билиһиннэрдэ. Маны сэргэ саха литературатын төрүттээччи, учуонай, бөлүһүөк А. Е. Кулаковскай- Өксөкүлээх Өлөксөй «Эдэр интеллегенцияҕа сурук» айымньытын сахатын норуотун ыччатыгар анаабыт кэс тылын туһунан кэпсээтэ. Оҕолор болҕойон иһиттилэр. Бэһис кылаас уолаттара Күндэ «Төрөөбүт тыл» хоһоонун доргуччу аахтылар.

Оҕолор, учууталлар сахалыы таҥастаахтара сүргэни көтөҕөр.