Бүгүн, олунньу 26 күнүгэр, киин библиотека ааҕааччыны кытта үлэлиир салаата Ньурбатааҕы техникум студеннарыгар эр санааланыы уруогун ыытта. Уруок сүрүн хайысхата-быыһыыр идэлээх үлэһиттэри билиһиннэрии. Бу идэ туһунан уонна Ньурбатааҕы быыһыыр этэрээт историятын Маргарита Романовна билиһиннэрбитин кэнниттэн Рея Петровна саха быыһыыр идэлээхтэрин уус ураннык сырдатар, кырачаан Карина Чикитова туһунан Виктория Габышева суруйбут «Кырачаан кыысчаан уонна аар тайҕа» кинигэтин билиһиннэрдэ.
Ол кэнниттэн Ньурбатааҕы быыһыыр этэрээт байыастара Васильев Вальтер Владимирович, Обухов Вячеслав Вячеславович тыаҕа муннахха, быыһааччылар кэлиэхтэригэр диэри, киһи бастакы ханнык хамсаныылары оҥоруохтааҕын, мас, от, күн хайысхаларынан, үрэх-өрүс устууларынан хайдах көмөлөһүннэриэхтээҕин, тымныыга кутааны хайдах оттунан иттиэххэ сөбүн олус үчүгэйдик, интириэһинэйдик, киһиэхэ тиийиэмтиэтик кэпсээтилэр. Бэриллибит боппуруостарга толору эппиэттэри биэрдилэр. Чахчы, киһи туһанарыгар наадалаах уонна туһалаах иһитиннэриини оҥордулар. Уолаттар налыччы, лоп-бааччы бэйэ бэйэлэрин ситэрсэн кэпсииллэриттэн, студеннары сэргэ биһиги уонна учууталлар, элбэх билбэппитин биллибит, астынныбыт. Өйүн сүтэрэн охтуу уонна сүрэх тохтооһуна туох уратылаахтарын быһааран, ону хайдах арааран киһиэхэ хайдах көмө оҥоһуллуохтааҕын «Гоша» куклаларыгар көрдөрөн үөрэттилэр.

Үлэбитигэр өрүү көмөлөһөр А. Р. Ноев салайааччылаах Ньурбатааҕы быыһыыр этэрээккэ киин библиотека аатыттан махтанабыт. Дьон олоҕун туһугар анаммыт үлэлээх биир дойдулаахтарбытыгар ситиһиилэри, кыайыылары эрэ баҕарабыт!

Ааҕааччыны кытта үлэлиир салаа.