Муус устар 25 күнүгэр Ф. Г. Сафронов аатынан Киин бибилэтиэкэҕэ саҥа кинигэ сүрэхтэниитэ буолла.
“Ньурба” хаһыат общественнай корреспондена, Мэҥэдьэк нэһилиэгин бочуоттаах олохтооҕо, педагогическай үлэ бэтэрээнэ, “Молодой гвардеец пятилетки”, “За преданность идеалам детства” бэлиэлэр хаһаайкалара Мирослава Николаевна Иванова сүүрбэччэ сылы быһа “Ньурба — Огни Нюрбы” хаһыакка суруйбут ыстатыйаларыттан «Мэҥэдьэк кэпсээнэ, Хатыы сонуна» диэн кинигэтэ 2-с чааһа күн сирин көрдө. Тупсаҕай көстүүлээх, 305 сирэйдээх «Мэҥэдьэк кэпсээнэ, Хатыы сонуна» кинигэ “Дани – Алмас” типографияҕа быйыл тохсунньу ыйга 25 экземплярынан таҕыста. Ааптар киирии тылыгар “суруйарбар көҕүлүүр киһинэн тапталлаах кэргэним Иванов Семен Александрович, көннөрөр, ситэрэр редакторым» диэн бэрт иһирэхтик ахтар. Кинигэҕэ нэһилиэк араас өттүттэн сырдатыллыбыт. Дойдуларыттан ыраата сылдьар дьон, ыччат бу кинигэттэн нэһилиэк олоҕун-дьаһаҕын, тэрилтэлэр үлэлэрин, нэһилиэнньэ култуураҕа уонна спортка сыһыанын, санаатын, кыһалҕатын, уратытын билиэхтэрэ.
Кинигэ сүрэхтэниитин аһыллыытын Антоновка оскуолатын 10 кылааһын оҕолоро алаадьылаах кымыһынан айах тутан, Мирослава Иванова кыыһа Николаева Күннэй салайар «Кэрэли» ансаамбыла уонна Ефимова Изабелла музыкальнай эҕэрдэлэринэн киэргэттилэр.
Үгүс үтүө тыллары этэн, өссө да үгүс ситиһиилэри баҕаран Ньурба улууһун баһылыгын социальнай боппуруостарга солбуйааччы Петрова Н. С., Ньурбатааҕы үлэ уонна социальнай харысхал управлениятын кыл.специалиһа Андреева Л. П., Хатыы администрациятын бэрэстэбиитэлэ Егорова М. С., Ньурбатааҕы инбэлииттэрин уопсастыбаларын бэрэссэдээтэлэ Алексеев А. Е., Ньурбатааҕы көрбөттөр уопсастыбаларын бэрэссэдээтэлэ Яковлева С. С., бииргэ үөрэммит дьүөгэлэрэ Гаврильева Е. Г., Данилова А. А., аймахтара Степанов В. Г., Федорова Г. Д., Ксенофонтова А. В. эҕэрдэлээтилэр.
Олох дохсуннук иннин диэки баран иһэр. Күнтэн–күн субуллан, дьыл-хонук ааһан иһэр. Кыһыны сайын, хараҥаны сырдык, үйэни үйэ солбуйан олох айаннаан күпсүйэр. Туох барыта умнуллар, история буолан хаалар. Ааспыт кэмнэр олуктарын бар дьонугар кэпсиир, үйэтитэр Мирослава Николаевна кинигэлэрэ дьонун-сэргэтин кэрэхсэбилин, биһирэбилин тардаллар.
