Саха сирин Ил Дарханын Айсен Сергеевич Николаев ыйааҕыгар олоҕуран ыам ыйын 25 күнүгэр Оһуохай күнүн аан бастакытын бэлиэтиэхпит. «Кыталык» култуура дьиэтин специалиһа Таисия Аркадьевна Кучурова, Ф.Г. Сафронов аатынан Киин библиотека үлэһиттэригэр, оһуохай хаамыытын, хамсаныыларын, илиибитин сөпкө тутарбытын көрдөрөн маастар кылаас ыытта. Оһуохайдьыт Таисия Кучурова хомоҕойдук хоһуйан, чоргуйар чуор куолаһынан оһуохайдатан сүргэбитин көтөхтө. Тарбахтарбытыттан тутуһан, түһүлгэни төрүттээн, доруобуйабытын тупсаран, өйбүтүн-санаабытын ыраастанан, астынан-дуоһуйан тарҕастыбыт. Таисия Аркадьевнаҕа барҕа махтал тылларын этэбит: ырыаҕынан-тойуккунан, бар дьоҥҥор үөрүүнү бэлэхтии сырыт! 

Унаар сайын күлүмэр      
Уопсай мустан тураммыт,    
Омоҕойбут үгэһинэн 
Оһуохайдаан оонньуоҕуҥ 
Эллэй эһэбит үгэһинэн 
Эһиэкэйдээн иһиэҕин! 

С.Васильев-Борогонскай