Ыам ыйын 30 күнүгэр Чуукаар нэһилиэгин олохтоох бибилэтиэкэтин уонна «Уран кут» литературнай түмсүү көҕүлээһининэн, Е.М.Поликарпов аатынан «Эйгэ» норуот айымньытын киинигэр биһиги биир дойдулаахпыт прозаик суруйааччы, биллэр суруналыыс Прокопий Яковлевич Прокопьев — Прокопий Чуукаар, төрөөбүт дойдутун дьонун кытары көрсүһэр бэрт сэргэх тэрээһин буолан ааста.
Прокопий Яковлевич Прокопьев — Прокопий Чуукаарга аналлаах выставка тэрилиннэ. Выставкаҕа Прокопий ЧУУКААР кинигэлэрэ, урукку хаһыаттартан ыстатыйалар уонна нэһилиэкпит суруйар дьонун кинигэлэрэ турдулар.

«Чуукаар нэһилиэгэ» муниципальнай тэриллии аҕа баһылыга Федоров Артур Юрьевич махтал, эҕэрдэ тылын этэн туран күндүтүк саныыр, убаастыыр киһибитигэр Прокопий Яковлевичка олохтоох дьаһалта, нэһилиэк дьокутааттарын, олохтоохтор уонна тус бэйэтин аатыттан махтал сурук, сэмэй бэлэх туттарда.
Тэрээһиҥҥэ кэлбит нэһилиэк олохтоохторо, ыалдьыттара бэйэлэрин ааспыт кэмнэрин ахтан-санаан, үтүөнү баҕаран туран эҕэрдэ тылларын тиэртилэр.
Чуукаар нэһилэгин «Уран кут» литературнай түмсүү айар куттаах дьонноро бэйэлэрин ырыа буолбут хоһоонорун иһитиннэрэн, ыллаан, хоһоон ааҕан үөртүлэр.
Бибилэтиэкэҕэ сандалы остуол тула олорон истиҥ-иһирэх кэпсэтии буолан ааста.
Прокопий Яковлевичка уонна кыыһыгар Нюрбина Прокопьевнаҕа Чуукаар нэһилиэгин «Уран кут» литературнай түмсүү аатыттан бэйэлэрин сэмэй бэлэхтэрин туттардылар.
Прокопий Яковлевич Прокопьев — Прокопий Чуукаар төрөөбүт түөлбэтин бибилэтиэкэтигэр «Олоҕум олуктара» диэн кинигэтин бэлэх уунна.
Биһиги, биир дойдулаахтара маннык биллэр-көстөр суруйааччылаахпытынан киэн туттабыт. Өссө да уһун дьоллоох олоҕу баҕарабыт.

Клавдия Андреева.