Сэтинньи 14 күнүгэр киин библиотека «Үрүҥ торуоска» ыйын чэрчитинэн Ньурбатааҕы көрбөттөр уопсастыбаларыгар «Олоҕу ылынабын махталынан» истиҥ түмүктүүр тэрээһини ыытта. Күрэххэ уопсастыба кэрэ аҥаардара, Далбар хотуттара кытыннылар.

Дьүүллүүр сүбэҕэ үлэлээтилэр Ньурбатааҕы көрбөттөр уопсастыбаларын бэрэссэдээтэлэ Яковлева С. С., Ньурбатааҕы оҕо ускуустубатын оскуолатын дириэктэрэ Николаев И. Н., Ф.Г. Сафронов аатынан киин бибилэтиэкэ ааҕааччыны кытта үлэлиир салаа бибилэтиэкэрэ Софронова Е. И., тэрээһини бэлэмнээтэ уонна ыытта бибилэтиэкэр Николаева Г.Е. Күрэх 5 түһүмэхтэрин (“Окко түспүт оҥоһуубунан, сиргэ түспүт сэрэбиэйбинэн” бэйэни билиһиннэрии, “Имигэс илии” көрүдьүөс оонньуу, “Айылҕаттан айдарыым” талаан көрүүтэ, “Алгыстаах ас эгэлгэтэ”, “Кэрэ Хотун” киэргэнэн-симэнэн тахсыыта) түмүгүнэн кыайыылааҕынан Лазарева Екатерина Николаевна – Далбар Хотун (Маар с.) буолла. Анал ааттар иҥэрилиннилэр:
Ксенофонтова Антонина Васильевна – Мааны Хотун (Ньурба)
Казакова Ирина Егоровна – Иэйии Хотун (Ньурба)
Степанова Светлана Сергеевна – Күбэйэ Хотун (Антоновка с.)
Баишева Валерия Афанасьевна – Талба Хотун (Маалыкай с.)
Васильева Эмма Иннокентьевна – Сайдам Хотун (Маалыкай с.)
Захарова Мария Ивановна – Ыллам Хотун (Бүлуу).
Күрэх кыттыылаахтара Добун суруктары, сэмэй бэлэхтэри туттулар. Дьүүллүүр сүбэ түмүк таһаарар кэмигэр, көрөөччүлэр «Дойдум миэнэ — Ньурба» викторинаҕа кыттан минньигэс бириискэ тигистилэр, Илья Николаев ылба5ай ырыаларын истэн астыннылар. Ыраахтан кэлбит ыалдьыттарбыт, кыттааччыларбыт бу курдук көхтөөх тэрээһиннэр ыытылла туралларыгар баҕа санааларын тиэрдэн, махтанан тарҕастылар.

Ф. Г. Сафронов аатынан Ньурбатааҕы киин библиотека

ааҕааччыны кытта үлэлиир салаата.