Алтынньы 17 күнүгэр Дикимдэ оскуолатын үөһэ кылаас үөрэнээччилэригэр анаан улуу нуучча поэта, биллиилээх прозаига М. Ю. Лермонтов төрөөбүтэ 210 сылынан «Великий сын России» диэн ааттаах литературнай чаас бэрт сэргэхтик ыытылынна.

Литературнай чааһы нэһилиэк библиотекатын сүрүннүүр библиотекара С. Н. Павлова уонна олохтоох оскуола нуучча тылын уонна литературатын учуутала Е. К. Николаева бэлэмнээн ыыттылар. Бастаан оскуола 8 кылааһын үөрэнээччитэ Алексеева Уйгулаана презентация көмөтүнэн кылгастык М. Ю. Лермонтов олоҕун кытта билиһиннэрдэ. Салгыы Саввинов Сергей, Рахматова Мадина, Иванова Аня, Андреев Дамир поэт хоһооннорун аахтылар.

Салгыы библиотекарь С. Н. Павлова оҕолорго ананан бэлэмнэниллибит «Великий сын России» кинигэ быыстапкатын кылгастык билиһиннэрдэ. Ол кэнниттэн «Мой Лермонтов» диэн тус коллекциятын быыстапкатын кытта биирдиилээн экспонаттарынан сиһилии билиһиннэрэн кэпсээтэ. Оҕолор быыстапканы олус интэриэһиргээн көрдүлэр-иһиттилэр. Ордук сонурҕаан кырачаан кинигэлэри, былыргы открытканы, значоктары, тарелкалары, Лермонтов статуэткатын уонна бюһун көрдүлэр, сороҕун бэл астына илиилэригэр ылан тутан-хабан сиһилии чинчийэн көрдүлэр.

Дикимдэ филиалын сүрүннүүр библиотекара С. Н. Павлова