Кытай гороскобугар моҕой биир саамай ытыктанар үөн буолар. Кини өй-санаа уонна муударай буолуу бэлиэтэ, ону кытта тэҥҥэ – имигэс уонна албас, киитэрэй буолуу бэлиэлээх. Бу хаачыстыбаларынан кини туох эмит уларыйыылары чэпчэкитик уонна холкутук ылынар кыахтаах.

“Бытааннык, сэрэнэн хамсанар дьоҕуру – маны толкуйдуур, ырытар дьоҕур нөҥүө үөрэниэххэ наада. 2025 сылга, эн ордук инники көрүүнү тутуһуохтааххын уонна сөптөөх былааннары оҥоруохтааххын,” диэн цифровой психоанализ экспертэрэ уонна нумерлогтар этэллэр.

Ахсынньы 13 күнүгэр Ф.Г. Сафронов аатынан Киин бибилэтиэкэҕэ үһүс оскуола кыттыылаахтара бу күн уһуйааччы Николаева Г.Е. маастар кылааһыгар кэлэр сыл бэлиэтин күөх моҕойу оҥордулар, бары араастык кыһаллан бэйэлэрин илиилэрин сылааһынан тутан-хабан оҥорбут оҥоһуктарын бэлэх гынан илдьэ бардылар.

Кыттааччылар маннык мустан бэйэ-бэйэбитин кытта ирэ-хоро кэпсэтэрбит олус үчүгэй диэн астыналларын эттилэр, күннээҕи түбүгү умнан бу күн оҕо саастарыгар тиийэн, урукку кэмҥэ бу бырааһынньыкка хайдах оонньуурдар баалларын санаатылар.

Ааҕааччынын кытта үлэлиир салаа.