Бэс ыйын 8 күнүгэр ыаллыы сытар Малдьаҕар, Мэҥэдьэк, Малыкай нэһилиэктэрин аҕам саастахтарын түмсүүлэрэ үгэс буолбут сайыны көрсүү «Дьоһун саас, эрчимнээх түһүлгэтэ» Маалыкайдааҕы “Иэйиэхсит” түмсүү 30 сыллаах үбүлүөйүгэр аналлаах слет буолан ааста.
Бу дьоллоох түһүлгэни МТ «Бордоҥ нэһилиэгин» Дьаһалтатын, «Айар Киин» НАДЬ уонна «Иэйиэхсит» түмсүү кыттыылаахтара тэрийэн ыыттылар. Биһиги ыҥырыылаах мааны ыалдьыт буолан, түөрт массыынаннан 11 эбээ, 5 эһээ буолан, олус үчүгэй, истиҥ-иһирэх көрсүһүүгэ дуоһуйа, астынан, сэргэхсийэн кэллибит.
11 чааска Маалыкай ыһыахтыыр сиригэр мустаммыт нэһилиэктэринэн түһүлгэбитин киэргэтэн, сахалыы ас арааһын көрдөрүүгэ бэлэмнээтибит. Ол кэннэ, слетпут үөрүүлээх аһыллыытыгар парадтаан киирдибит. МТ «Бордоҥ нэһилиэгин» Дьаһалтатын Аҕа Баһылыга Степанов П.Ю. эҕэрдэ тылын эттэ, «Иэйиэхсит» түмсүү бастыҥ кыттыылаахтарыгар махтал суруктары туттартаата.
Хатыы, Малдьаҕар нэһилиэгин аҕам саастаахтарын түмсүүлэрин салайааччылара эҕэрдэ тылларын, ырыаларын анаатылар уонна өйдөбүнньүк бэлэхтэрин туттардылар. Элбэх үтүө тыллар этилиннилэр, ырыалар ылланнылар. Үөрүүлээх чаас кэнниттэн түһүлгэ көрүүтэ буолла. Малыкайдар, Хатыылар түһүлгэлэрин олус үчүгэйдик киэргэппиттэрэ көрүөххэ олус үчүгэйэ. Онтон Малдьаҕардар салайааччыбыт Надежда Михайловна салайыытынан, дьаһайыытынан саамай элбэх 45 араас сахалыы астаах буоламмыт, кыайыы 80 сылыгар анаан тикпит, нэһилиэкпит историятын кэпсиир «Ким да умнуллубат, туох да умнуллубат!» диэн паннобутун илдьэ баран 1 миэстэни ылан үөрүүбүт үрдээтэ.
Дьэ, ол кэннэ Малыкай аҕам саастаах дьоно-сэргэтэ үс уһун остуол хотойорунан ас тардыбыттарын ирэ-хоро сэһэргэһэ-сэһэргэһэ эбиэттээтибит. Самовардаах итии чэйдэрэ, үөрэ миинэ, эт миинэ, кус миинэ, саламааттара о.д.а. астара тобус толору, мип минньигэс. «Айар киин» НАДь директора Харитонов Иван Семенович саҥаран-иҥэрэн дэгэлдьитэн, дьону көҕүлээн, олус үчүгэйдик оонньууну, көрү-нары, үҥкүүнү-битиини, ырыаны-тойугу оройуттан тутта. Эбээлэр, эһээлэр эдэрдэригэр түстүлэр, сүргэлэрэ көтөҕүлүннэ. Биһиги Н.Сэмиэнэп аатынан НАК-нин уус-уран салайааччыта Кононова С.В. ураты куолаһынан элбэх ырыаны ыллаан түһүлгэни киэргэттэ. Малдьаҕар түмсүүтүн аатыттан улахан махталбытын биллэрэбит — бу тэрээһини тэрийбит, ыыппыт «Айар Киин» НАДЬ үлэһиттэригэр, «Иэйиэхсит» түмсүү кыттыылаахтарыгар, биһигини илдьибит – аҕалбыт суоппардарбытыгар, сахалыы аска сүбэ-ама биэрбит Дьячковская Юлия Семеновнаҕа. Баҕарабыт хас биирдиигитигэр кытаанах доруобуйаны, билиҥҥигит курдук эдэрдии дууһаны, көхтөөх туругу, этэҥҥэ буолууну, дьон туһугар оҥорор үтүөҕүт тус бэйэҕитигэр уон оччонон төннүннүн, махтаммыт дьон үөрүүтэ-көтүүтэ эһиги олоххутун уһаттын, диэн алгыспыт маанытын аныыбыт! Дом!
Елена Иванова
