Муус устар 3 күнүгэр, В. Г. Белинскэй аатынан бибилэтиэкэҕэ «Кинигэ — үйэлээх бэлэх» диэн көрсүһүү үрдүк таһымнаахтык ааста. ​Бу күн бибилэтиэкэ иһэ ааҕааччыларынан, суруйааччыларынан уонна кинигэ эйгэтин үлэһиттэринэн туолла. Көрсүһүү сүрүн сыала — сахалыы кинигэни тарҕатыы, ааптардар уонна ааҕааччылар икки ардыларыгар сибээһи тупсарыы. ​Тэрээһин сүрүн түһүмэхтэрэ: ✨ ​Салайааччылар кэпсээннэрэ: «Айар» кыһа дириэктэрэ Август Егоров уонна солбуйааччыта Валерий Луковцев тэрилтэ үйэлээх историятын, бүгүҥҥү туругун, инники былааннарын туһунан сиһилии билиһиннэрдилэр. ✨ Наҕараадалааһын: «Бастыҥ ааҕааччы», «Бастыҥ ааҕар дьиэ кэргэн», «Бастыҥ ааҕар оҕо», «Бастаан арыйааччы», «Кинигэ абылаҥын арыйааччы» номинацияларга кыайыылаахтар анал бэлэхтэринэн наҕараадаланнылар. ✨ ​Кинигэ айыллар кистэлэҥэ: Анал бырайыактар салаатын эрэдээктэрэ Айсена Тимофеева уонна ааҕааччы киэҥ араҥатыгар туһуламмыт таһаарыылар эрэдээктэрэ Алина Бурцева саҥа тахсыбыт кинигэлэр, атын бородууксуйа, инники былааннар туһунан кэпсээтилэр. ✨ ​Ааптардары кытта көрсүһүү: Киэһэ саамай долгутуулаах чааһынан биллиилээх суруйааччылары кытта быһаччы алтыһыы буолла. Бэйэлэрин айар үлэлэрин туһунан Дмитрий Пономарев-Дьолуолаах, Василий Гоголев-Уйулҕан, Евдокия Иринцеева-Огдо уонна Александр Бурнашов истиҥник сэһэргээтилэр, автограф-сессия ыыттылар. Ааҕааччылар долгутар боппуруостарын ыйытан, баҕа санааларын тириэрдэн астыннылар, толору хоруйдары ыллылар. ✨ ​Атыы-эргиэн: Ыалдьыттар «Айар» саҥа таһаарыыларын кытта билсэн, сөбүлээбит кинигэлэрин атыыластылар. ​Бу тэрээһин ааҕааччылар төрөөбүт тылынан тахсар айымньыларга интэриэстэрэ үрдүгүн өссө төгүл бигэргэттэ.

«Айар» кыһа ааҕааччыларын кытта маннык истиҥ көрсүһүүлэри инникитин да ыыта турар былааннаах.