Ийэ буолуу дьолун билбит күн күбэй ийэлэргэ, сиэн туһугар түбүгүрэр элэккэй эбээлэргэ, килбик кийииттэргэ Саха сирин Ийэлэрин күнүнэн итии-истиҥ ис сүрэхтэн эҕэрдэ!
Федот Сафронов аатынан кииннэммит бибилэтиэкэ ситимин иһинэн үлэлиир «Ньурба уоттара» литературнай холбоһук талааннаах хоһоонньута Тамара Николаева — Сарыада бүгүҥҥү, сабыс-саҥа хоһооннорун анал күммүтүнэн бэлэх уунабыт!

Күн сирин дьахтартан көрөҕүн,
Ол дьахтар эмиийин үүтүнэн,
Күүс,эрчим олоххор ылаҕын,
Борбуйгун көтөҕөн сүүрэҕин.

Дьахтары олуһун таптааҥҥын,
Кынаттаах кэриэтэ көтөҕүн,
Халлаантан сулуһу ылҕааҥҥын
Оронун киэргэтэн биэрэҕин.

Дьахтартан сылтааҥҥын ытыыгын,
Эр киһи хараҕын уулара,
Ол дьахтар түөһүгэр таммалаан,
Мууһурбут сүрэҕин уулларар.

Ардыгар дьахтартан сылтааҥҥын,
Тобуктаан ылаҕын,олоххор,
Тарбаҕын төбөтүн таарыйаат
Эн көнөн кэлэҕин дьиктитик.

Дьахтар баар алыптаах таҥара,
Баҕарыа,дьолунан толоруо,
Сэҥээрбэт,сэнээбит күнүгэр,
Күн уота харааста барыҥныа.


Харыстааҥ,аан дойду аанньалын,
Сир Ийэ маанылыыр оҕотун!
Арчылыыр,аһынар чыычааҕын!
Күн тэҥэ күн күбэй ийэни!
             
                                   САРЫАДА НЬУРБА.

Түлэй түүн,им балай хараҥа,
Дьон бары утуйан ырааппыт,
Биир түннүк симиркэй уотугар,
Оҕотун кэтэһэр,күн ийэ.

Билэҕин,эн ийэҥ күүтэрин,
Түннүгү одуулаан турарын,
Чуумпуну иһиллээн оргууйдук,
Дириҥник үөһүтэ тыынарын.

Санаарҕаан,сылайан сытыаҕыҥ,
Аттыгар эн ийэҥ олоруо,
Сып-сылаас,эйэҕэс ытыстар,
Баттаххын таарыйан ааһыаҕа.

Эн ийэҥ сайаҕас санаата,
Үйэлэр тухары арыаллыа,
Биллибэт күүһүнэн күрүөлээн,
Эйигин арчылыы сылдьыаҕа.

Харыстааҥ,күн күбэй ийэни,
Иэйиэхсит эҥэрдээх киһини,
Бу сиргэ күн сирин көрдөрбүт,
Айыыһыт кэриэтэ дьахтары.

Харыстааҥ,тапталын угуттааҥ!
Олоҕун дьолунан толоруҥ!
Ийэ баар бу сирбит Аанньала,
Олохпут сып-сырдык сирдьитэ.
           
                                САРЫАДА НЬУРБА.