Комсомол үгүс мөлүйүөнүнэн уолаттарга уонна кыргыттарга улахан олоххо путевка биэрбит тэрилтэ быһыытынан иҥэн хаалбыт.
Комсомол ыччаты иитиигэ киллэрбит кылаата тугунан да кэмнэммэт.
Комсомол ветераннара бэйэлэрин эдэр саастарын идеалларыгар уонна принциптэригэр, комсомольскай доҕордоһууларыгар билигин да эрэллэрин ыһыкта иликтэр, республика общественнай-политическай олоҕор, үүнэр көлүөнэни иитиигэ кыахтара тиийэринэн көмөлөһөллөр. Комсомол гражданскай уонна Аҕа дойду Улуу сэриитин фроннарыгар героизмы көрдөрүү, индустриализацияҕа уонна коллективизацияҕа улахан кылааты киллэрии, урусхалламмыт норуот хаһаайыстыбатын сэрии кэнниттэн чөлүгэр түһэрии, кырыс уонна оһорбо сирдэри баһылааһын иҺин Ийэ дойду алта үрдүк наҕараадатыгар тиксибитэ.
Ыччат бүтүн Сойуустааҕы Ленинскэй Коммунистическэй союһун летопиһыгар Саха сирин комсомольскай тэрилтэтин историятын дьоҺун страницалара суруллубуттара. Алмаас хостонор эпопеята аан дойду үрдүнэн киэҥник биллибитэ. Бүлүүтээҕи ГЭС бастакы уочарата, БАМ магистралын тутуу, Мирнэй, Удачнай, Нерюнгри куораттар, Депутатскайдааҕы ГОК уо.д.а элбэх тутуулар тутуллубуттара. Сахабыт сирин ыччата өрүү инники күөҥҥэ сылдьыбыта. «Оскуола-производство—үрдүк үөрэх» ураты хамсааһынтан элбэх биллиилээх учуонайдар, производство салайааччылара үүнэн-сайдан тахсыбыттара.
Ыччат Бүтүн Сойуустааҕы Ленинскэй Коммунистическэй союһа, комсомол диэн тыллар билиҥҥи аҕа саастаах көлүөнэҕэ наар үөрүүнү – өрөгөйү, кыайыыны-хотууну, хотуулаах улэни, эйэлээх коллективы, дьоллоох эдэр сааһы кытта ситимниир.
Билиҥҥи ыччат тэҥнэһэ сатыыр дьоннордоох, эһэлэрин уонна аҕаларын, эбэлэрин уонна ийэлэрин дьыалаларын салгыыр кыахтаах. Кинилэр үлэҕэ чаҕылхай ситиһиилэрэ, бэйэни харыстаммат үлэлэрэ, эр санаа, үтүө майгы бэлиэтинэн буолар.
Биһиги нэһилиэкпитигэр Хаҥаласка бастакы комсомольскай ячейка 1932 сыллаахха тэриллибит. Ячейка сэкирэтээринэн Маруся Иванова диэн кыыс талыллыбыт, 20-чэ комсомол чилиэнэ суруттарбыт. Салҕыы комсомольскай ячейка сэкирэтээринэн Петр Егорович Ефремов буолбут.
Билигин баар аҕам саастаах дьон бары комсомол кэккэтигэр сылдьыбыт, үлэ, үөрэх бастыҥнара этилэр, кинилэр бу кэмнэрин олус күндүтүк сылаастык саныыллар, олохторун биир дьоллоох кэминэн сөпкө ааттыыллар.
Бырааһынньыгынан, күндү биир дойдулаахтарбыт, айар тутар сирдьит буолбут Комсомол күнүнэн!
Мария Николаева, библиотекарь.
