МКУ "Нюрбинская МЦБС"

Центральная районная библиотека имени Федота Григорьевича Сафронова

«Арассыыйа дьоруойдара — биир дойдулаахтарбыт»

Олунньу 20 күнүгэр, Ньурбатааҕы техническэй лицейгэ алтыс кылаастарга «Арассыыйа дьоруойдара — биир дойдулаахтарбыт» диэн эр санаа уруога ыытылынна. Бу тэрээһин үүнээри турар Аҕа дойдуну көмүскээччилэр күннэригэр ананна. Уруокка оҕолор ийэ дойдуга таптал киһиэхэ хаһан иҥэрин, дойдуга бэриниилээх буолуу диэн тугун толкуйдаатылар, бэйэлэрин санааларын үллэһиннилэр. Онтон билигин буола турар анал байыннай дьайыыга саха чулуу уолаттара кытталларын, кинилэр бары биһиэхэ холобур буолалларын бэлиэтээтибит. Сүрүн болҕомтону хорсун быһыыларын иһин Арассыыйа дьоруойа үрдүк ааты ылбыт биир дойдулаахтарбыт тустарынан матырыйаалга уурдубут. Ол курдук, А.Колесов, Д.Егоров, А.Неустроев, Ф.Евсеев, И.Юргин, Н.Соболев, Н.Евдокимов, Р.Максимов, Д.Куценко уонна Ньурбаттан сылдьар А.Григорьев тустарынан билистибит. Чуолаан Андрей Григорьев геройдуу хорсун быһыытын ахтан-санаан ыллыбыт. Оҕолор бу уруокка чуумпуран олорон болҕойон истибиттэрэ, кэпсэтиигэ кыттыбыттара — бу кинилэр улаатан эрэллэрин, улахан дьоннуу толкуйдуулларын, олоххо баар көстүүнү ылыналларын туоһулуур. Тэрээһин бүтүүтэ оҕолор муударай саха өс хоһооннорун ааҕан уол оҕо , эр киһи айылҕаттан хайдах буолуохтааҕын өссө төгүл санаатылар.

Ушканова Я.В.