Оройуоннааҕы «Утум. Ситим. Кэскил» Форум чэрчитинэн Арктикатааҕы судаарыстыбаннай ускуустуба, култуура уонна креативнай индустрия университетын ректора, Россия үрдүк үөрэхтээһинин үтүөлээх үлэһитэ, Саха Өрөспүүбүлүкэтин култууратын үтүөлээх үлэһитэ, Педагогическай наука кандидата, профессор, биир дойдулаахпыт Саргылана Семеновна Игнатьева, ону тэҥэ Культурология уонна култуура нэһилиэстибэтин кафедратын профессора, социологическай наука дуоктара, психология наукатын кандидата, циркумполярнай цивилизация научнай-чинчийэр киинин салайааччыта Ульяна Алексеевна Винокурова, норуот уус-уран култууратын уонна социальнай-культурнай үлэ кафедратын доцена, педагогическай наука кандидата Василиса Александровна Васильева ыалдьыттаатылар.

Бүгүҥҥү көрсүһүү биир соругунан Чаппанда орто оскуолатын уонна «Дьо5ур» норуот айымньытын дьиэтин икки ардыларыгар бииргэ үлэлииргэ сөбүлэҥ баттааһыыта буолла.

Саргылана Семеновна оскуола инники сайдыытыгар бэйэтин көрүүлэрин үллэһиннэ, ол курдук эбии үөрэхтээһин күүскэ үлэлиэхтээҕин чопчулаан эттэ. 7-11 кылаас үөрэнээччилэригэр «Как подростку реализовать и продвигать свой проект» диэн Василиса Васильева маастар кылааһа оҕолор болҕомтолорун тарта.

Тэрээһин кэмигэр оҕолорго араас маастар-кылаастар буоллулар, төрөппүттэр, үөрэнээччилэр, учууталлар уус-уран оҥоһуктарын быыстапката турда.