Балаҕан ыйын 19 күнүгэр А. С. Моякунов – Мойокуун Индеев быйыл төрөөбүтэ 75 сылыгар Ф. Г. Сафронов аатынан Киин бибилэтиэкэҕэ Степан Васильев аатынан элбэх хайысхалаах оскуола 8 кылааһын оҕолоругар «Бөлүһүөк учуутал аатыгар сүгүрүйэн» А. С. Моякунов–Мойокуун Индеев аатын, үлэлэрин нөҥүө истиҥ кэпсэтии тэрээһин буолла.

Ыалдьыттарбыт: Никифоров Владимир Антонович — Ньурба ытык кырдьаҕаһа, учууталлар учууталлара, СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ; Моякунова Евдокия Ивановна — бастыҥ общественник, Ньурба улууһугар биллэр активист Далбар Хотун. Кини “Ньурба уоттара” литэрэтиирэнэй түмсүү биир сүрүн чилиэнэ, Мойокуун Индеев айар үлэтин дьоҥҥо-сэргэҕэ сырдатааччы, тарҕатааччы; Софронова Ольга Васильевна – Суһум — СӨ доруобуйатын туйгуна, Саха суруйааччыларын сойууһун чилиэнэ, поэт, тылбаасчыт; Моякунова Августа Аркадьевна, Степан Васильев аатынан элбэх хайысхалаах оскуола «Саха Сирин эрэлэ» бэлиэлээх саха тылын уонна литературатын учуутала.

Владимир Антонович доҕоро, биир идэлээҕэ Аркадий Спиридонович Моякунов — Учуутал, бэйиэт, тылбаасчыт, уус буоларын, саха оҕотун кыра сааһыттан төрүт үгэстэрин, култуураларын үөрэтиигэ уонна сыһыарыыга анаан анал үөрүйэхтэри киллэрбитин, уһуйааннары кытта ыкса үлэлэһэрин түмүгүнэн уһуйаан саҕаттан оҕолору олоҥхоннон саха култууратын үөрэтиигэ көмө кинигэлэри суруйбутун олус умсулҕаннаахтык кэпсээтэ. Ольга – Суһум «Алып куттаах айымньылар…” А. С. Моякунов хоһооннорун ырытыытын билиһиннэрдэ. Евдокия Ивановна – Кучу Мойокуун тылбаастарын сахалыы, нууччалыы ааҕан иһитиннэрдэ. Кыыһа аҕатын кытта биир сүбэнэн оҥорбут «Кыыс Куо» бырайыагын билиһиннэрдэ.

Оҕолор талааннаах биир дойдулаахтарын туһунан үгүс саҥаны, сонуну иһиттилэр. Киин бибилэтиэкэ фондатыгар харалла сытар Мойокуун Индеев үлэлэрин быыстапкаҕа көрөн, барыта илииннэн суруллубутун, уруһуйдаммытын сөхтүлэр.

Ааҕааччыны кытта үлэлиир салаа