СӨ Национальнай бибилэтиэкэтэ, “Ил Түмэн” бэчээт дьиэтэ уонна “Саха Сирин култуурата” айар холбоһук кыттыһан тэрийбит “ҺӨҔҮҤ: сахалыы айымньы” диэн буктрейлер өрөспүүбүлүкэтээҕи күрэҕэ түмүктэннэ.
Барыта 93 ролик киирбит. Ону үрдүк таһымнаах дьүүллүүр сүбэ сыаналаата: кинорежиссер, сценарист, Москубатааҕы 40-с кинофестиваль Гран-при хаһаайына Эдуард Новиков, Хотугулуу-Илиҥҥи федеральнай университет бэрэпиэссэрэ, наука дуоктара, саха литературатын кафедратын сэбиэдиссэйэ Валентина Семенова, Арассыыйа худуоһунньуктарын сойууһун чилиэнэ, Култуура уонна ускуустуба Аартыкатааҕы институтун преподавателэ, “Саха Сирин култуурата” айар холбоһук көхтөөх чилиэнэ, бу куонкурус ойуутун-бичигин барытын уруһуйдаабыт Надежда Комиссарова, СӨ Национальнай бибилэтиэкэтиттэн сүрүннүүр үлэһит, бу күрэҕи көҕүлээччи Татьяна Хомоксонова уонна “Ил Түмэн” бэчээт дьиэтиттэн суруналыыс Галина Матвеева.
Балаһыанньаҕа биллэриллибитин курдук, “Үөрэнээччи”, “Эдэр ыччат”, “Дьиэ кэргэн” диэн үс бөлөҕүнэн кыайыылаах быһаарылынна. Ону сэргэ сэҥээриини ылбыт буктрейлердарга анал ааттар иҥэриллиннилэр. Усулуобуйа быһыытынан, кэлэктиибинэн кыттыы көҥүллэммит буолан, кыттааччы ахсаана 500-тэн тахса буолбут. Ньурба оройуонуттан 7 киһи кыттынна. Оттон дьон-сэргэ ханнык буктрейлеры ордук сэҥээрбитин билээри, ыам ыйын 23-24 күннэригэр СӨ Национальнай бибилэтиэкэтин саайтыгар онлайн-куоластааһын ыытыллыбыта. Дьэ, маныаха 317 ааҕааччы куолаһын хомуйан, Ньурба улууһун Күндээдэтиттэн Борис Габышев-Варламов “Биһик” диэн Д. Пономарев-Дьолуолаах сэһэнигэр устубут буктрейлера “Көрөөччү биһирэбилэ” ааты ылла уонна С.А. Новгородов аатынан “Айар” национальнай хампаанньаттан 5 тыһыынча солкуобай суумалаах сэртипикээтинэн наҕараадаланна.
Манна даҕатан эттэххэ, бу Дьолуолаах “Биһик” сэһэнэ “Айар” сыл аайы туттарар бириэмийэтигэр “Бастыҥ проза” буолбута. Дьоһун айымньыга – дьоһун ролик.
Үөрүөхпүт дуу, соһуйуохпут дуу иһин, көрөөччү санаатын кытта дьүүллүүр сүбэ быһаарыыта эмиэ биир буолан биэрдэ. Ол курдук, баалларын ааҕан таһаарбыппыт, улахан дьон бөлөҕөр Борис Габышев-Варламов кыайыылаах таҕыста. Дьэ, чахчы, кини буктрейлерын көрөн баран, үгүс киһи бу “Биһик” сэһэни ааҕыан баҕарбыта буолуо. Борис Николаевичка Ил Түмэн дьокутаата, “Саханефтегазсбыт” генеральнай дириэктэрэ Виктор Лебедев туруорбут ноутбуга ананна.Саамай элбэх үлэ “Үөрэнээччи” диэн бөлөххө киирбит. Кимнээх эрэ киинэ курдук оонньоон, сорохтор дьүһүйүү курдук туруоран, хайалара эрэ мультик курдук ойуулаан, ханныктар эрэ кинигэ бэлэм хартыыналарынан сэһэргээн, быһата, хааччах суох буолан, бэйэлэрин көрүүлэринэн айан, бииртэн биир хатыламмат буктрейлердары оҥорбуттар. Ньурба Маалыкайыттан Алексей Дмитриевкэ, Ньурба Хатыытыттан Санаайа Яковлеваҕа, Ньурба Ынахсытыттан Эвелина Ждановаҕа – “Сосновый бор” оҕо сынньалаҥ-чэбдигирдэр киинигэр путевканан наҕараадаланнылар.
Улахан дьоҥҥо биһирэбил бириискэ тигистилэр: Ньурба Маалыкайыттан Афанасий Потапов. Өксөкүлээх Өлөксөй “Саха интеллигенциятыгар” суругар буктрейлерын иһин – DNS сэртипикээт, Ньурбаттан Мария Огочоева (Саха тыйаатырыгар 2 билиэт), Ньурба Антоновкатыттан Анжелика Николаева (“ҺӨҔҮҤ” курууска).Киирбит үлэлэри ырытан көрдөххө, нууччалыы эттэххэ, саамай популярнай суруйааччы Николай Лугинов эбит. 15 буктрейлер кини айымньыларыгар оҥоһуллубут. Тимофей Сметаниҥҥа – 9 ролик.Алампа “Куоратчыт” кэпсээнигэр, Н. Якутскай “Төлкө” романыгар, Далан “Дьикти саас” сэһэнигэр, Куорсуннаах “Кыра Тыгын” тылбааһыгар, Амма Аччыгыйа “Тоҕус төгүл “тоҕо?” тэттик кэпсээннэригэр, С.Васильев-Борогонскай “Эрчимэн Бэргэн” олоҥхотугар, Суорун Омоллоон “Күкүр Уус” драматыгар, “Биэс ынахтаах Бэйбэрикээн эмээхсин” остуоруйаҕа, Т. Сметанин “Күөрэгэйигэр” уонна “Егор Чээринигэр”, Н.Лугинов “Кустук” уонна “Суор” сэһэннэригэр хастыы да үлэ киирбитэ – бу айымньылары ыччат сөбүлүүрүн кэрэһилиир.
Кыттааччыларга, кинилэр салайааччыларыгар, күүс-кѳмѳ буолбут дьоҥҥо барыгытыгар махталы уонна өссө да ситиһиилэри баҕарабыт!
