Быйыл 2024 сыл Арассыыйа президенын В. В. Путин ыйааҕынан Дьиэ кэргэн сылынан биллэриллибитэ.  От ыйын 8 күнэ — Бүтүн Арассыыйаҕа Дьиэ кэргэн, таптал уонна эрэллээх буолуу күнэ —  2008 сылтан бэлиэтэнэр буолбута. Бигэ туруктаах, дьоллоох дьиэ кэргэн – таптал, үтүө санаа уонна кыһамньы биһигэ, дьоллоох дойду бөҕө тирэҕэ буолар. Бу күн үһүс көлүөнэ орто оскуолатын чэрчитинэн, Ф. Г. Сафронов аатынан Киин бибилэтиэкэҕэ тарбаҕар талааннаах Саргылана Михайловна Харитонова  «Биэс харах» харысхалы кыбытык тигии ньыматынан маастар кылаас ыытта. Биэс харахтаах харысхал өбүгэлэрбититтэн кэлбит харысхалбыт, ымыыбыт буолар.  Хара дьайтан, куһаҕан тыынтан, сэттэн-сэлээнтэн, киһини быһа этэр тылтан харыстыыр.

Ньурба мааны кийиитэ, Мэҥэ-Хаҥалас Чыамайыкытыттан төрүттээх, элбэх оҕо амарах ийэтэ, элбэх сиэн минньигэс сытыттан дьоллонор эбээ, «Бартыһаан» түөлбэ биир саамай актыыбынай олохтооҕо, 2020 сылтан норуот маастара, байыаннай дьайыы саҕаланыаҕыттан үлэлиир «КөмүсКэл» иис сыаҕар (сал. Федорова Г. Д.) Саргылана Михайловна баҕа санаатын ууран, уолаттарбыт этэҥҥэ сылдьан, кыайыы көтөллөөх кэлэллэригэр баҕаран туран үлэлиир. Бибилэтиэкэ ыытар тэрээһиннэригэр мэлдьи кыттар.

Саргылана Михайловнаҕа уонна маастар кылаас кыттыылаахтарыгар  дьолу уонна чэгиэн туругу, тапталы уонна бэриниилээх буолууну баҕарабыт! Дьиэ кэргэҥҥитигэр өрүү сылаас сыһыан, үтүөҕэ дьулуһуу арыалластын, чугастык саныыр, таптыыр, мэлдьи күүтэр дьонноох дьиэҕит сырдыгынан сыдьаайдын!

                                                              Ааҕааччыны кытта үлэлиир салаа.