«Киһи бэйэтин олоҕун дьиэ кэргэнигэр, төрөөбүт дойдутун, улууһун дьонугар аныхтаах, кинилэр тустарыгар олоруохтаах, оччоҕуна эрэ киһи бэйэтин олоҕор ситиһиилээх буолар… Хас биирдии киһи Орто Дойдуга мээнэ туох да сыала-соруга суох төрөөбөт уонна олорбот, онон кини инники олоҕун бэйэтэ эрэ оҥостор» — Борис Григорьевич тылларынан “Олох суола”, “Талыллыбыт тылбаастар” , “Мои воспоминания” диэн кинигэлэрин биһирэмнэрэ Ф. Г. Сафронов аатынан киин бибилэтиэкэҕэ бэс ыйын 20 күнүгэр буолла.
Борис Григорьевич Николаев Мархаҕа (Хатыҥ Сыһыыга) төрөөбүт, Хорула, Маар оскуолаларыгар үөрэммит, үлэлээбит, СГУ-га тутуу инженерин идэтин баһылаан, биэнсийэҕэ тахсыар диэри дьиэ-уот тутуутугар маастарынан, прорабынан, инженеринэн, сметчигинэн араас тэрилтэлэргэ үлэлээбитэ. Билигин Дьокуускай куоракка олохсуйан олорор.
Борис Григорьевич бастакы кинигэтэ “Олох суола. Үөрэх” диэн 2020 сыллаахха «Көмүөл” кинигэ кыһатыгар 50 ахсаанынан, 176 сирэйинэн бэчээттэнэн тахсыбыт.
Иккис кинигэтэ “Мои воспоминания” нууччалыы тылынан 2022 сыллаахха тахсыбыт, ийэтин Дарья Петровна Николаева сырдык кэриэһигэр анаабыт. Манна үнүбэрситиэккэ үөрэммит сылларын, бииргэ үөрэммит табаарыстарын, учууталларын туһунан ахтыыларын 7 түһүмэххэ киллэрбит.
«Талыллыбыт тылбаастар» кинигэтэ Дьокуускай куоракка Дани Алмаас кинигэ кыһатыгар 2023 сылга 30 ахсаанынан тахсыбыта, кинигэни тапталлаах кэргэнигэр Анна Егоровнаҕа анаабыт.
Тылбаастаабыт дьоно аан дойду ааттаахтара: Алигьери Дантеттан саҕалаан аатырбыт Гете, Шиллер, нуучча улуу суруйааччылара А.Пушкин, М.Лермонтов, Л.Толстой уонна д.а., Арассыыйа бастыҥ учуонайа, тыл үөрэхтээҕэ Михаил Ломоносов, поэзия үрүҥ көмүс үйэтин суруйааччылара Николай Гумилев, Марина Цветаева, Сергей Есений уонна да атыттар. Кинигэҕэ 50 поэт 244 хоһооно тылбаастанан киирбиттэр.
Ф. Г. Сафронов атынан Киин бибилэтиэкэ үлэһиттэрэ Борис Григорьевич тылбаастаабыт хоһооннорун аахпыттара мустубут дьон сэҥээритин ылла.
Кинигэ сүрэхтэниитигэр «Ньурба уоттара» литературнай түмсүүттэн Пономарев Д.Н. – Дьолуолаах, Моякунова Е.И. – Кучу, Шестаков Т.И. – Чоххуруос, Сельтюкова А.Р. – Айаалла, Федотова В.Д. – Алгыстаана, Ытык ааҕааччыларбыт — Петрова С.Г., Николаев И.И., Тимофеев В.И., Алексеев А.Е. уо.д.а. санааларын үллэһиннилэр, Борис Григорьевичка тулхадыйбат доруобуйаны, үгүс үтүмэн үөрүүнү, айар талаанын аартыга уһуннук тыргылла туруохтун диэн сахалыы сайаҕас тылынан алгыс бастыҥын анаатылар. Истиҥ-иһирэх көрсүһүү уопсай хаартыскаҕа түһүүнэн түмүктэннэ.
Ф. Г. Сафронов аатынан киин бибилэтиэкэ ааҕааччыны кытта үлэлиир салаата
