Аан дойду үрдүнэн Түмэл күнүн көрсө ыам ыйын 18 күнүгэр С. П. Алексеев — Боһуут аатынан орто оскуолаҕа түмэл уруоктара ыытылыннылар. Оҕолор бу уруоктан Аан дойдутааҕы түмэл күнүн устуоруйатын, түмэл диэн тугун, туохха наадалааҕын биллилэр. Чаппандатааҕы Н. Т. Степанов аатынан фольклорнай — литературнай түмэли тэрийбит Н. Т. Степанов туһунан, түмэл фондатын кытта билистилэр. Уруок иккис чааһыгар муус устар 26 күнүгэр Ньурбатааҕы кииннэммит бибилэтиэкэҕэ буолан ааспыт “Эргэ чымадаан кистэлэҥэ» кинигэ сүрэхтэниитин, прозаик, ССРС СС (Суруйааччылар Союзтарын) чилиэнэ, суруналыыс Степан Прокопьевич Федотов олоҕун, айар үлэтин кытта билсиһэн видео-презентация көрдүлэр. Түмүккэ кинигэ сүрэхтэниитигэр С. П. Федотов кыыһа Сардана Степановна түмэлгэ туттарбыт матырыйаалларын педагог-бибилэтиэкэр, түмэл салайааччыта Николаева Анна Борисовна, саҥа бэриллибит матырыйааллары билиһиннэрдэ уонна “Эргэ чымадаан кистэлэҥэ“ кинигэ ис хоһоонун, кимнээх таһаарбыттарын сырдатта. Оҕолор Түмэлгэ саҥа киирбит матырыйааллары көрдүлэр-иһиттилэр, билистилэр.

Е. С. Тимофеева бибилэтиэкэр.