Сэтинньи 25 күнүгэр Дикимдэҕэ Россияҕа Дьиэ кэргэн, СӨ Оҕо саас сылларынан Ньурбаҕа бастакытын ыытыллыбыт «ДЬИЭ КЭРГЭН — БИИР СОМОҔО» өй оонньуута ситиһиилээхтик ыытылынна.
Оонньуу-күрэххэ 7 ыал үс көлүөнэнэн кытыннылар: оҕо, төрөппүт, эбэ эбэтэр эһэ.
Кыттыыны ыллылар: Елизавета Семеновна Степанова, Наталья Семеновна, Мичийээнэ Васильевалар; Оксана Афанасьевна, Мичил Ильич, Айнаара Егоровтар; Андрей Гаврильевич, Светлана Владиславовна, Милена Антоновтар; Георгий Иванович Максимов, Майя Александровна, Серёжа Саввиновтар; Маргарита Романовна, Мария Егоровна Наумовалар, Ариана Николаева; Виктория Константиновна Семенова, Елена Вячеславовна, Лиза Алексеевалар; Любовь Афанасьевна Сабычикова, Айталина Акимовна, Дамир Андреевтар.
Оонньуу-күрэх кыттыылаахтара эрбии биитин курдук эриһэн 30 очкоттан 26 очкону ылан Любовь Афанасьевна Сабычикова, Айталина Акимовна, Дамир Андреевтар кыайыылаах буоллулар. Кинилэр Добун сурук, Туоһу сурук, бириис таһынан нэһилиэк аатыттан ахсынньы ыйга Ньурбаҕа ыытыллар күрэххэ кыттарга Ыҥырыы сурук туттулар.
25 очкону ылан Оксана Афанасьевна, Мичил Ильич, Айнаара Егоровтар хамаандалара иккис миэстэни ыллылар, Добун суругунан, Туоһу суругунан, бирииһинэн бэлиэтэннилэр. Кинилэртэн биир эрэ очконан хаалан Елизавета Семеновна Степанова, Наталья Семеновна, Мичийээнэ Васильевалар хамаандалара үһүс миэстэҕэ тахсан эмиэ Добун сурук, Туоһу сурук, бириис тутан үөрдүлэр-көттүлэр.
Күрэх атын да кыттааччылара бары ситиһиилээхтик кытыннылар, бары Туоһу сурук, бириис тутан оонньууттан астынан тарҕастылар.
Тэрээһини иилээн-саҕалаан ыытта, бириистэри спонсордаата нэһилиэк библиотекатын сүрүннүүр библиотекара С. Н. Павлова. Онон Дикимдэҕэ Дьиэ кэргэн сылынан элбэх ыал кыттыылаах улахан тэрээһин бэрт сэргэхтик, ситиһиилээхтик ааста.
Кыайыылаах хамаандабыт (Л. А. Сабычикова, А. А. Андреева, Д. Андреев) бу ааспыт кыһын «Чолбон» сурунаал оройуоҥҥа ыыппыт Өй күрэҕэр кыттан бастакы миэстэни ылан кыайыылаах буолбута, Дьокуускайга баран оройуон аатыттан кыттыахтааҕа саас сиринэн сырыы бобуллан кыайан барбатахтара. Бу сырыыга Ньурбаҕа киирэн ситиһиилээхтик оонньуохтара диэн эрэнэн туран кинилэргэ кыайыыны-хотууну баҕарыаҕыҥ!
