Ыам ыйын 15 күнүгэр Дьиэ кэргэн күнүгэр аналлаах Хорула нэһилиэгэр «Дьиэ кэргэн — дьол уйата» диэн 50 — тан, 60 -тан тахса сыл бииргэ олорбут дьиэ кэргэттэрбитин кытта уонна быйыл оҕоломмут эдэр ийэлэри кытта истиҥ көрсүһүү буолла. Тэрээһин чэрчитинэн эҕэрдэ суруктар, сэмэй өйдөбүнньүк бэлэхтэр туттарылыннылар. Өр сыл бииргэ олорбут дьоммут эдэрдэргэ кэс тылларын эттилэр. Сахалыы аймах ааттарын туһунан, өс хоһооннорун ситэриигэ викторинаҕа көхтөөхтүк кытыннылар.

Ыал буолбут историяны кэпсииргэ күрэх биллэриллибитигэр кыттан 50 сыл бииргэ олорбут Кюдяковтартан Надежда Авзалтиновна олус кэрэхсэбиллээхтик кэпсээн дьиэ кэргэн альбомун бэлэх туттулар. Марта Ивановна кэргэнин Макар Васильевыһы таҥха кэмигэр биһилэххэ көрбүтүн кэпсээн барыбытын сөхтөрдө. Чахчы да «дьылҕа хаан ыйааҕа» диэн баар эбит диэн итэҕэйдибит.

Бу бэлиэ күнү сахалыы куттаах ытык ыалларбыт, эдэркээн ийэлэрбит олоҥхобут балаҕаныгар итии чэйдээх сандалы тула олорон истиҥник кэпсэтэн аһардыбыт.

Андросова Л. И.