Кулун тутар 14 күнүгэр эмиэ Хорулабыт нэһилиэгэр дьоро күн тосхойдо. Дойдутун, дьонун туһугар үтүө суобастаахтык, кыһамньылаахтык үлэлээбит үлэ бэтэрээнэ,  Хорула нэһилиэгин бочуоттаах олохтооҕо, СӨ муниципальнай сулууспа туйгуна, муниципальнай сулууспа бэтэрээнэ, «Ньурба оройуонун социальнай-экономическай сайдыытыгар кылаатын иһин», СӨ  «Ытык сүбэ» бэлиэлэр хаһаайына  Николаев Николай Иванович туһунан «Дьоҥҥо анаммыт олох»  диэн кинигэни кэргэнэ Джемма Кирилловна уолунаан Кирилл Николаевичтыын хомуйан, таҥан таһааран бар дьонноругар сүҥкэн бэлэҕи оҥордулар.

Кинигэ сүрэхтэниитигэр элбэх аймах — билэ дьонноро, кэллиэгэлэрэ, бииргэ оскуолаҕа, Н.Г.Чернышевскай аатынан Бүлүүтээҕи педучилещаҕа үөрэммит доҕотторо, нэһилиэгин  дьоно — сэргэтэ истиҥник иһирэхтик ахтан аастылар. Дьоро күҥҥэ тумус туттар дьоммут : Дьокуускайтан — Ю.Н.Иванов, Ньурбаттан — И.И.Николаев , А.Г.Федорова, А.Е.Алексеев, Чаппандаттан кэллиэгэтэ — Т.Д. Сидорова ыалдьыт буолан эҕэрдэ эриэккэһин эттилэр, үөрүүлэрин үллэһиннилэр, Джемма Кирилловнаҕа, оҕолоругар махталларын эттилэр.

Суруйар — бичийэр, талба талааннаах дьоммут  А. Р. Сельтюкова- Айаалла, К.Т. Куприянова- Хочот Кыыһа, И.В.Иванов -Хоһоон, В.И.Игнатьев — Байанайдаах хоһоон хонуутугар күүлэйдэттилэр. 

Николай Иванович нэһилиэгин дьонун олоҕун — дьаһаҕын хараҕын далыгар тутан төһөлөөх үтүөнү, үйэлээҕи оҥорон хаалларбытын бу кинигэҕэ сырдатыллан ааҕааччы киэҥ билиитигэр таҕыста.

Инникитин даҕаны Ытык дьоммут олохторо сырдатылла турдуннар, кэлэр көлүөнэҕэ дьоһун бэлэх, үтүө холобур буоллун!