Сэтинньи 27 күнүгэр Ф.Г.Сафронов аатынан киин бибилэтиэкэ 95 сыллаах үбүлүөйүн чэрчитинэн «Ньырбакааны аах!» диэн саҥа кинигэ ааптара Д.Н.Пономарев — Дьолуолааҕы кытта истиҥ, сэргэх көрсүһүү буолла!
«Ньурба уоттара» айар түмсүү бибилэтиэкэ үбүлүөйүнэн анабыл хоһооннорун бэлэх ууннулар. Д.Н.Пономарев — «Дьолуолаах» көрсүһүүгэ кэлбит дьоҥҥо автографтаах кинигэлэрин атыылаата. А.П.Александров — Сахса Тар бэйэтэ мастан оҥорбут аттаах сыарҕатын Дьолуолаахха бэлэхтээтэ. Семёнова М.Е., Угапьева У., Яковлева А.А., Яковлев А.М., Ксенофонтова А.В., Федотова В.Д., Иннокентьева А.П. кинигэ туһунан санааларын үллэһиннилэр.
Айтилля Анатольевна Тимофеева: «Улахан аартыктаах суруйааччы диэн ылыммытым. «Биһик» диэн кинигэни ааҕан баран, «Ньырбакааны» ааҕа олорон киинэ курдук көрдүм, олус чэпчэкитик ааҕыллар айымньы», — диэн бэлиэтээтэ.
Надежда Афанасьевна Кириллова эҕэрдэтигэр: «Ньурбаны таптаан, Ньурба туһунан «Ньырбакааны» суруйарга санаммыт эбит. Миигиттэн саха таҥастарын суолтатын ыйыппыта. Ийэм 89 саастаах Дьолуолаах айымньыларын сөбүлээн ааҕар», — диэн санаатын үллэһиннэ.
Кинигэни ааҕааччылар Ньырбакаан төрүттэрэ сүрдээх санаалаах, күүстээх эбиттэрин биллилэр. Бу кинигэҕэ интэриэс улаатта, ааҕааччы элбээтэ. Дьолуолаах «Ньырбакаан» диэн айымньытыгар бэргэһэтин ойуута үс уоллааҕын көрдөрөр диэн сөхтүлэр, умсугуйдулар.
Көрсүһүүнү кыраайы үөрэтэр салаа библиотекара Ноева Маргарита Романовна салайан ыытта. Дмитрий Пономареву бэлиэ түгэнинэн эҕэрдэлиибит уонна киниэхэ салгыы айар үлэтигэр ситиһиилэри баҕарабыт!
Аа5аччына кытта үлэлиир салаа.
Хартыскалары бу сигэнэн киирэн көрүҥ
