Бүгүн, атырдьах ыйын 14 күнүгэр «Ньурба уоттарын» туллар тутааҕа, салайар-дьаһайар бас көс киһибит, суруйааччы Дмитрий Николаевич Пономарев — Дьолуолаах Мэҥэ Хаҥалас Мэлдьэхси нэһилиэгэр күн сирин көрбүт күнэ.

1979 сылтан Розалия Николаевналыын ыал буолан Күндээдэ нэһилиэгэр олохсуйуоҕуттан биһиги ньурбалар киэн туттар бастыҥ киһибит буолар.

Мас тардыһыытыгар Сахаада спордун маастара, СӨ физкультураҕа уонна спортка туйгуна, Күндээдэ нэһилиэгин бочуоттаах олохтооҕо, «Ньурба куорат патриота» бэлиэлээх, «Ньурба уоттара» оройуоннааҕы айар куттаахтар түмсүүлэрин салайааччыта, СӨ суруйааччыларын сойууһун чилиэнэ Д. Н. Пономарев — Дьолуолаах Ньурбатааҕы кииннэммит бибилэтиэкэ ситимин күндү доҕоро, айар дьонун бибилэтиэкэлэрбит иһинэн түмэн былааннаахтык үлэлэтэр, ыытыллар тэрээһиннэрбитигэр тус бэйэтинэн көҕүлэһэр, ыытыһар, тэрийсэр…

Күндү киһибитин, иккис дойдуҥ Ньурбаҥ дьоно-сэргэтэ төрөөбүт күҥҥүнэн истиҥник эҕэрдэлиибит! Тапталлаах Ньурбабыт дорҕоонноох аатын ырааҕынан -чугаһынан аатырдар суруйааччыбыт айар талааҥҥар сүгүрүйэбит! Ньурба сирин суруйар-бичийэр, айар дьоҕурдаах дьонун көҕүлээн, түмэн илдьэ сылдьаргар махтанабыт! Бу орто дойду кэрэтэ, истиҥэ, дьиктитэ эн аттыгар буоларыгар үтүө баҕа санаабытын куйаар нөҥүө ыытабыт!
Дьоллоох эрэ буол, Дьолуолаах Миитэрэй, дьоһун-мааны киһибит!

2020 сыллаахха Д. Н. Пономарев Варвара Потаповаҕа анабыл хоһооннорун аахпыта киин бибилэтиэкэ архыыбыгар харалла сытарын истиҥ, биһирээҥ.