Алтынньы 29 күнэ – Хомсомуол төрөөбүт күнэ. Ньурбатааҕы киин бибилэтиэкэҕэ бу күн өссө Онтуонабыс күнэ. Ааспыт сылларга Онтуонабыс, хомсомуол эрэллээх байыаһа, ыытыллар тэрээһин сүрүн геройа буолара.
Онтон быйыл, Владимир Антонович Никифоров 85 үбүлүөйдээх сааһын туолуохтаах сылыгар, «Дьылҕа ыйааҕынан» кинигэ биһирэмэ…
«Гражданскай килбиэн», ”Свет добра”, «СӨ норуотун уус уран айымньытын сайдыытыгар кылаатын иһин», «С.А.Зверев-Кыыл Уола ансамблын кыттыылааҕа» бэлиэлэрдээх СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ, Чаппанда нэһилиэгин уонна Ньурба улууһун Бочуоттаах олохтооҕо,СӨ үөрэҕин ситимин бочуоттаах бэтэрээнэ В.А. Никифоров олоҕун кэрдиис кэмнэрин кэпсиир ДЬЫЛҔА ЫЙААҔЫНАН кинигэ биһирэмэ хайа да тэрээһиннэрдээҕэр элбэх киһини муспута, тэрээһин үс чаас барбыта Онтуонабыс дьиҥ чахчы Ньурба чаҕылхай киһитэ буоларын, айымньылаах олоҕу олорон дьонугар-сэргэтигэр сырдык-сылаас эрэ тыыны хаалларбытын туоһута…
«Дьылҕа ыйааҕынан» кинигэни хомуйан оҥорооччу — Чаппандатааҕы Н.Т.Степанов аатынан фольклор-литература түмэлин салайааччыта, Чаппанда, Ньурба историятын үйэтитээччи, кыраайы үөрэтээччи, “Ньурба уоттара” литературнай түмсүү чилиэнэ, В.А.Никифоров үөрэнээччитэ, аймаҕа Т.Д.Сидорова. Бу Татьяна Дмитриевна бэлэмнээн таһааттарбыт 30-с кинигэтэ ДАНИ-АЛМАС кинигэ кыһатыгар быйыл бу ыйга бэчээттэнэн таҕыста, ахсаана бэрт кэмчи 50 экземпляр.
Кинигэҕэ Владимир Онтуонабыс олоҕун үгүстэргэ биллибэт кэрдиис түгэннэрэ: С.Зверев ансаамблын кыттыылааҕын быһыытынан, 1965 сыллаахха Москва куоракка съезтэр дыбарыастарыгар фестивальга кыттыыта уонна Чаппанда 8 кылаастаах оскуолатыгар ДРУЖБА ырыа-үҥкүү ансамблын тэрийиитин, үлэлэтиитин туһунан. Кинигэҕэ Антонович бэйэтин уонна биир кэмҥэ олорбут, үлэлээбит, алтыспыт дьоннорун, үөрэнээччилэрин ахтыылара киирбиттэр. Олус элбэх араас кэми кэрэһэлиир, кэпсиир хаартыскалар киһи болҕомтотун тардаллар.
Владимир Антонович бу кинигэтэ тахсарын олус күүтэрэ, кинигэтин төлөбүрүн бэйэтэ төлөөн, рукопиһын көрөн барбыта….
Онтуонабыс хомсомуолун күнүгэр кинигэ нөҥүө сырдык сыдьаайынан күндү киһибитин аҕынныбыт, санаатыбыт. Кини кый ыраахтан, үөһэттэн чап чараастык сэгэйэ үөрэн кинигэтин сүрэхтэниитин долгуйа билэн эрдэҕэ, барыта табыллыа диэн араҥаччылыы турдаҕа диэн итэҕэйиэҕиҥ.
Т.Д.Сидорова хомуйан оҥорбут Владимир Антонович Никифоров «Дьылҕам бэлэҕэ» кинигэтин киин бибилэтиэкэттэн уларсан ааҕан 60-70-80 сыллардааҕы саха норуотун үҥкүүтүгэр-ырыатыгар олук уурбут Ньурба талааннаах ыччаттарын айымньылаах олохторун ааҕыҥ, билсиҥ, киэн туттуҥ.
«Дьылҕа ыйааҕынан» кинигэ биһирэмиттэн түгэннэр
Сиһилии бу сигэнэн киирэн көрүҥ
