Кулун тутар 9 күнүгэр Сырдык суолу хаалларан … механизатор, элбэх ыччат дьону техникаҕа сыһыарбыт, Хорула күтүөтэ Васильев Александр Васильевич олоҕун сырдатар кинигэни сүрэхтээтибит.


Кинигэ күн сирин көрөрүгэр Александр кэргэнэ Валенина Васильевна алта кыыһынаан, күтүөттэринээн, уоллара Славалыын кэргэнигэр, аҕаларыгар махталларын бэлиэтин санааларын түмпүттэр.
Кинигэ кытаанах тастаах, элбэх хаартыскалардаах, ахтыылар киирбиттэр. «Дани — Алмас» тэрилтэҕэ бэчээттэнэн тахсыбыт.

Үөрүүлээх дьоро күҥҥэ Александр Васильевич аймах — билэ дьонноро ыраахтан — чугастан тоҕуоруһа муһуннулар. Хаҥаластан «Дьүрүскэн» ырыа бөлөҕүн кыргыттара ылбаҕай ырыаларынан күндүлээтилэр.

Александр тимир көлөҕө сыһыарбыт, араас мындырдарыгар уһуйбут кыракый уолаттара номнуо ыал аҕалара буолан баараҕыдыйбыттар. Истиҥ тылынан уһуйааччыларын ахтан аастылар. Маны таһынан «Кэскил» култуура үлэһиттэрэ видеоннан ахтыылары хомуйан үйэтиппиттэрин көрдөрдүлэр. Биһиги Һаасабыт урукку Хорулабыт айанын суолугар сырыы баар буоларын туһугар улахан сыратын уурбута. Хомойуох иһин оһолго эрдэ олохтон туораабыта. Билигин айан суола оҥоһуллан оройуон киинигэр көнө суол тыргыллар, айанньыттар аҕыйах чааһынан сылдьаллар. Манна биһиги Александр Васильевичпыт — Һаасабыт сырата, сырдык баҕа санаата кыттыспыта.