Олунньу 27 күнүгэр Ньурба оройуонун Хорула нэһилиэгэр норуот тапталлаах ырыаһыттара Сиэйэ Уола — Айыллыата Дьырылыат уонна Кылаан Кындыл ыалдьыттаан, нэһилиэк олохтоохторугар кэрэхсэбиллээх «Күн эргиирэ» диэн кэнсиэрдэрин бэлэхтээтилэр. Олус сэргэх, санааны көтөҕөр, сылааны таһаарар ырыа-тойук киэһэтэ буолан ааста.
Бу бэлиэ түгэҥҥэ биир Өрөспүүбүлүкэбит убаастанар, киэн туттар киһитэ, Сунтаар улууһун Бордоҥ нэһилиэгин олохтооҕо, сааһын тухары араас хаһаайыстыбаларга үлэлээн, ыанньыксыт сыралаах үлэтин баһылаабыт Үлэ Геройа Владимир Африканович Михайлов ыалдьыттыы кэллэ.
Владимир Африканович бука барыбытыгар холобур буолар, килбиэннээх үлэтинэн, дьоһун олоҕунан биллэр. Кини элбэх үрдүк наҕараадалардаах:
• Арассыыйа Федерациятын Үлэтин Дьоруойа (1992 сыл муус устар 29 күнэ) – Судаарыстыбаҕа уонна норуокка ураты өҥөлөрүн иһин.
• «Бочуот» уордьана (2013 сыл балаҕан ыйын 13 күнэ) – Агропромышленнай комплексы сайыннарыыга улахан кылаатын, ситиспит үлэтин үрдүк көрдөрүүлэрин уонна элбэх сыллаах үтүө суобастаах үлэтин иһин.
• «Үлэ Албан Аатын» 1, 2, 3 степеннээх уордьаннара (1990, 1983, 1976 сыллар) – Уһун кэмнээх таһаарыылаах үлэтин уонна норуот хаһаайыстыбатын сайдыытыгар киллэрбит кылаатын иһин.
• Саха Өрөспүүбүлүкэтин (Саха сирин) норуот хаһаайыстыбатын үтүөлээх үлэһитэ.
• Саха Өрөспүүбүлүкэтин «Хотугу Сулус» уордьана.
• Саха сирин Ленинскэй Хомсомуолун бириэмийэтин лауреата.
Кэнсиэр иннинэ Владимир Африканович нэһилиэги кытта сиһилии билистэ. Олохтоох оскуолаларга сылдьан үөрэнээччилэри, учууталлары кытта кэпсэттэ, ферма хотоннорун, сайдыылаах нэһилиэк сквердэрин көрдө-иһиттэ. Бу көрсүһүүлэр олохтоохторго улахан сэргэхсийиини, үөрүүнү аҕалла.
«Күн эргиирэ» кэнсиэригэр Үлэ Дьоруойа Владимир Африканович Михайлов эмиэ кыттыыны ылан, тапталлаах артыыстары кытта ыллам ырыа доҕуһуолласта. Кини сырыыта нэһилиэк дьонугар-сэргэтигэр хайҕал, ытыктабыл уонна патриотизм тыынын иҥэрдэ.
Бу күн Хорула нэһилиэгин олохтоохторугар умнуллубат, кэскиллээх түгэннэри бэлэхтээтэ. Кэнсиэр уонна ытык киһибит ыалдьыттааһына дьон сүргэтин өрө көтөхтө, инникигэ дьулуһууга саҥа күүһү-уоҕу биэрдэ.
Бибилэтиэкэр Лариса Ивановна
