Сэтинньи 26 күнүгэр, сарсыарда 11 чааска Олоҥхо дэкээдэтин чэрчитинэн Иванов В. И. — Чиллэ Баһылай аатынан Олоҥхо дьиэтигэр орто саастаах оскуола оҕолоругар «Олоҥхо — саха норуотун бастыҥ айымньыта» тэрээһин буолла.
Оҕолорго ЮНЕСКО шедеврыгар киирбит олоҥхобут туһунан уонна «Уруйдан Улуу Олоҥхобут!» кинигэ быыстапкатын билиһиннэрии буолла. Мантан салгыы икки хамаанданан арахсан олоҥхо — батллга күрэхтэһэн холоннулар. Олоҥхо туһунан өйдөбүллэрин чиҥэтэн хамаандалар «Олоҥхо дойдутун оҕотобун» диэн хамаанданан уруһуй күрэҕэр кытыннылар. Аал уоппутун арыылаах алаадьынан күндүлээн, оҕолор да амсайан, төрүт утахпытын — быырпах иһэн, хас биирдиилэрэ олоҥхо бэлиэлээх кинигэ закладкалаах астынан тарҕастылар.

Онтон күнүс 15 чаастан Хорулабыт нэһилиэгэр «Олоҥхо дьыктаанын» ыыттыбыт. Барыта 8 киһи суруйда. «Бастыҥтан бастыҥ суруксут» үрдүк аатын ылла Е. К. Федоров аатынан алын кылаас учуутала Чочанова Надежда Николаевна, «Бастыҥ суруксут» аатын ылла Романова Анна Ивановна.

«Үчүгэй суруксут» аатын ыллылар: Иванова Мария Гаврильевна, Иванова Алена Руслановна, Степанова Надежда Никитична, Румянцева Наталья Александровна. Дьыктаан суруйуутугар, ааҕыытыгар Е. К. Федоров аатынан Хорула орто оскуолатын саха тылын уонна литературатын учуутала Окоемова Людмила Александровна үлэлэстэ.

Төрөөбүт төрүт тылбыт сүппэтин — оспотун, сахабыт омугун саргыта саппаҕырбатын туһугар кыттыбыт, үлэлэспит, бэйэлэрин сэмэй кылааттарын киллэрсибит дьоммутугар барҕа махтал буоллун! Уруйбут улааттын! Күөрэгэйбит көрүлээтин!

Лариса Андросова.