Айгыр-силик алааһым

Айыы-далбар куйааһын-

Күн сүрэҕиҥ сылааһын

Иэйэр куппар иҥэрэн.

Күҥҥэ өрө көтөхпүт

Күндү Ийэм, эн бааргын.

Былыт үөһэ көтүппүт

Үрдүк Айыым –эн бааргын.

(Клара Васильева)

Кулун тутар 25 күнүгэр Чаппанда нэһилиэгэр М.С.Семенов аатынан «Дьоҕур» норуот айымньытын дьиэтигэр,  2022 сыл- СӨ Ийэ сылын  көрсө  тахсыбыт, Чаппанда нэһилиэгин 7 дьоруой ийэлэрин, 10 “Ийэ албан аата” уордьан толору кавалердарын, элбэх оҕону төрөппүт акушерка Александра Михайловна Широкова тустарынан, кинилэр олохторун, оҕолорун, сиэннэрин үлэлэрин-хамнастарын сырдатар кинигэ сүрэхтэниитэ үөрүүлээхтик ааста.

  Бу үтүөкэн кинигэни биир санаанан салайтаран, идея туһугар үлэлээн хамнаан оҥорон таһаардылар юрист үөрэхтээх, быраабы харыстыыр уорган бэтэрээнэ, майор, милииссийэ туйгуна, Дьокуускайдааҕы В.П.Керемясов аатынан 3 №-дээх оҕо спортивнай оскуолатын кадр отделын иниспиэктэрэ, “Олом”,“Чаҕыл уоттаах Чаппанда чаҕылхай кыыһа” кинигэлэр ааптардара Зоя Саввична Бухолова, РФ үөрэхтээһинин салаатын бочуоттаах үлэһитэ, СӨ үөрэҕириитин туйгуна, Уус Алдан Дүпсүн оскуолатын учуутала, “Олом”, “Эбээ Сүөкүлэ сыдьааннара”, “Махтал маҥнайгы үктэл”“Чаҕыл уоттаах Чаппанда чаҕылхай кыыһа” кинигэлэр, “Алтан чуораан алгыһынан” икки кинигэ-альбом ааптардара  Раиса Петровна Протопопова (Бухолова).

   Тэрээһиҥҥэ кинигэ  ис хоһоонун, хайдах, туохтан саҕалаан, хайдах үлэлээбиттэрин, суолтатын тустарынан ааптардар Зоя Саввична Бухолова, Раиса Петровна Протопопова билиһиннэрдилэр уонна бэйэлэрин махталларын кинигэ тахсарыгар матырыйаалынан көмөлөспүт Т.Д. Сидороваҕа, кинигэҕэ киирбит ийэлэр оҕолоругар, сиэннэригэр, кинигэ тахсыытыгар көмөлөспүттэрин иһин, бэйэлэрин истиҥ тыллаах махталларын тиэртилэр ,                  Чаппанда администрациятын, тыа сирин түөлбэтин баһылыгын солбуйааччыта Екатерина Афанасьевна Иудинова нэһилиэк администрациятын, депутаттарын ааттарыттан эҕэрдэ суруктары туттарда. Н.Т.Степанов аатынан фольклорнай-литературнай түмэл салайааччыта Татьяна Дмитриевна Сидорова, Маар нэһилиэгин олохтооҕо, Дьоруой ийэ, СР үтүөлээх учуутала, учууталлар учууталлара  Дарья Федоровна Яковлева, Дьоруой ийэлэр:Иванова Валентина Михайловна оҕолорун ааттарыттан Иванова Маргарита Григорьевна,  бииргэ төрөөбүттэрэ Александр, Михаил, Василий, Сардана, Евгений,    Алексеева Екатерина Федотовна кыргыттара Мария, Маргарита Акимовналар,  Егорова Татьяна Михайловна кыргыттара: Наталья, Татьяна Прокопьевналар,  сиэннэрэ, Семенова Анна Михайлоана оҕолорун аатыттан Оксана Дмитриевна Давыдова,  тоҕус оҕолоох ийэлэр:Васильева Ульяна Петровна уола Дьокуускайтан Васильев Алексей Дмитриевич, элбэх оҕолоох ийэ Егорова Зоя Васильевна, Иванова Прасковья Федоровна оҕолоро: кыргыттара, уола  Николай Петрович Иванов ,   Степанова Дария Михайловна, Михайлова Мария Михайловна кыыһа Елизавета Афанасьевна сиэннэринээн оҕолоро кэлэннэр ыалдьыттаатылар, махтал тылларын,  эҕэрдэ бастыҥын тиэртилэр, бэйэлэрин махтал суруктарын туттардылар,  ийэлэрин үтүө-истиҥ тылларынан ахтан-санаан аастылар.

  Бүгүҥҥү күнү эҕэрдэ ырыатынан Николай Петрович Иванов уонна тойугунан Маргарита Акимовна Алексеева киэргэтэн, силигин ситэрэн биэрдилэр.

  Истиҥ күнү олохтоох библиотекарь Елена  Тимофеева иилээн-саҕалаан ыытта, хаартыскаҕа түһэрэн үйэтиттэ Оксана Давыдова.

  Дьоруой ийэ Дарья Федоровна Яковлева нэһилиэк олохтоохторугар улуус нэҺилиэктэрин Герой ийэлэрин туҺунан кинигэ оҥороору сылдьарын, онно матырыйааллары хомуйа сылдьарын кэпсээтэ уонна онно нэһилиэк олохтоохторун матырыйаал хомуйааһыныгар күүс-көмө буолалларыгар ыҥырда. Кинигэ ааптардарыгар Зоя Савичнаҕа, Раиса Петровнаҕа махталын эттэ уонна салгыы өссө аҕалары үйэтитэн кинигэ таһааралларыгар, баҕа санаатын тириэртэ. Ийэлэри үйэтитии үлэтин манан эрэ түмүктээбэккэ нэһилиэкпитигэр “Дьоруой ийэлэргэ” аналлаах сквер курдук эмиэ барыбыт күүспүтүнэн инникитин баар буолара буоллар,- диэн баҕа санаалар этилиннилэр.

   Кинигэ ааптардарыгар Зоя Саввичнаҕа, Раиса Петровнаҕа ыраах да олордоргут, төрөөбүт нэһилиэккит историятын,  дьонун-сэргэтин умнубакка, сурукка тиһэн, үйэтитэн, үйэлээх үлэни оҥоро сылдьаргытынан киэн туттабыт, нэһилиэк олохтоохторун ааттарыттарыттан махталбытын тириэрдэбит.

 “Махтанабын күндү ийэбэр-

Орто дойду күнүн көрдөрөн,

От-мас сытын ылларбыккар махтанабын” .— диэн Клара Васильева тылларынан бүгүҥҥү күммүт түмүктэннэ..

   Баҕарабыт үлэҕитигэр, үөрэххитигэр ситиһиилэри, чэгиэн доруобуйаны, уһун дьоллоох олоҕу. Саҥа кинигэбит эһиэхэ оҕолоргутугар, сиэннэргитигэр, хос сиэннэргитигэр саамай күндү үйэлээх бэлэх буолан дьиэтээҕи библиотекаҕытыгар биир сүрүн миэстэни ылан, саамай ааҕыллар кинигэ буоларыгар эрэнэ хаалабыт..

Олохтоох кэрэспэндьиэн Е.С.Тимофеева.