Олунньу 14 күнүгэр күнүс 3 чаастан Күндээдэ библиотекатын ааҕар саалатыгар оскуола алын кылааһын үөрэнээччилэрэ төрөппүттэринээн, чугас аймах дьонунаан «Ийэ тыл — киһи барҕа баайа, тыынар салгына» диэн тэрээһиҥҥэ кыттаары муһуннулар. Тэрээһиммит төрөөбүт тыл, сурук-бичик күнүгэр, Арассыыйаҕа дьиэ кэргэн, Саха Өрөспүүбүлүкэтигэр оҕо-аймах сылларыгар ананан ыытылынна.
«Туску» норуот айымньытын дьиэтин тутаах үлэһитэ Иринада Николаевна Ефремова төрөөбүт тылбыт сүппэтин туһугар бары сахалыы саҥарыахтаахпыт, сахалыы кэпсэтиэхтээхпит диэн туран оҕолорго нууччалыы тылынан этиини сахалыы тылбаастыыр оонньуу ыытта, төрөппүттэрдиин, кэлбит учууталлардыын бу тула кэпсэтии, санаа атастаһыыта буолла.
Оскуола саха тылыгар учуутала Анжела Александровна Александрова оҕону ийэ тылынан иитии тиэмэтигэр презентация көрдөрдө, кэпсээтэ.
Саха маҥнайгы тыл үөрэхтээҕин С. А.Новгородов туһунан билиһиннэрдибит. Төрөөбүт төрүт тылбыт саха омугун ураты бэлиэтэ буоларын билиэхтээхпит, тылбыт нөҥүө билиибитин хаҥатыахтаахпыт, өйбүтүн сайыннарыахтаахпыт, сахабыт тылынан киэн туттуохтаахпыт диэн сыаллаах «Дьиҥ саха саҥарар саҥата» диэн ааттаан 5 түһүмэхтээх тыл оонньуута ыытылынна.
Барыта 5 дьиэ кэргэн кыттыыны ылла:
1. Екатерина Егоровна Кононова сиэнинээн Вася Афанасьевтыын,
2. Татьяна Ахметовна Васильева уолаттарынаан Айхан уонна Эрсан
3. Аграфена Сергеевна уонна Аделина Самсоновтар
4. Ваира Семеновна уонна Айаал Корниловтар
5. Жанна уонна Григорий Парфеньевич Ананьевтар.
Оонньуу устата оҕолор чугас дьоннорунаан боппуруостарга эппиэттэстилэр, маҥнай килбигийэн саҥаларын дорҕооно кыратык иһиллэр эбит буоллаҕына, кэнникинэн улам улаатан, түргэнник сөптөөх эппиэт биэрэргэ дьулустулар.
Мин биири бэлиэтии көрдүм, бары кыттыбыт дьиэ кэргэн хас түһүмэх ахсын биир санааҕа киирэн төрөөбүт сахабыт тылынан быһаарсаллар, мөккүһэн да ылаллар, онно оҕолор сахалыы тылынан дьоннорунаан кэпсэтэллэрин.
Кыттааччылар бары да төрөөбүт тылларын билиилэрэ таһымнааҕын көрдөрдүлэр.
Түмүккэ: Самсоновтар дьиэ кэргэттэрэ эрэллээхтик бастаатылар, Корниловтар -2 миэстэ, Ананьевтар -3 миэстэ буоллулар.
Барыларыгар добун суруктар, сахалыы кинигэлэр, минньигэс бэлэхтэр туттарылыннылар.
Киһи төһөнөн төрөөбүт тылын билэр да, соччонон сайдыылаах буоларын санаан туран оҕолорбутун саха омук буолалларынан киэн туттарга үөрэтиэххэ наада диэн биир санааҕа кэлэн тэрээһиммитин түмүктээтибит.
Күндээдэ бибилэтиэкэтэ
