Ийэ тыл уонна сурук-бичик күнүгэр аналлаах Ньурбатаагы көрбөттөр уопсастыбаларыгар (ВОС) ытыктабыллаах чилиэннэригэр тэрээһин ыыттыбыт. Бу көрсүһүүбут сүрүн сыала-соруга – сахабыт төрүт тылын, сурук-бичик историятын олохтоохтук билии, таптыырга ыҥырыы уонна инники кэнэҕэски ыччакка тиэрдии.

Ол чэрчитинэн, биһиги саха норуотун үөрэхтээһиҥҥэ, суругу-бичиги төрүттээһиҥҥэ сүҥкэн кылааты киллэрбит чулуу уолунан, бастыҥ өйүгэр буһаран таһаарбыт өйүккэ олоҕуран саха алпаабытын, суругун төрүттээбит Семен Андреевич Новгородов үтүө аатын-суолун ааттаан, кини олоҕун, үлэтин туһунан дириҥ ис хоһоонноох, сэҥээрэ истэр кэпсээни тэрийбиппит.

Кини сүҥкэн үлэтинэн, ытык өйдөбүлүнэн сахабыт тыла билигин да тыыннаах, сайда турар. Кэпсээн кэнниттэн, биһиги сахабыт тылын кэрэтин, баайын, дириҥин өссө чугастык билэллэрин, сэргээн истэллэрин туһугар араас көрүҥнээх тыл оонньууларын тэрийбиппит. Биһиги уопсастыбабыт ытыктабыллаах чилиэннэрэ бу тэрээһиҥҥэ олус көхтөөх кыттыыны ыллылар. Хас биирдии оонньууга ымсыырыылаахтык ырытыһан, хоруйдары булан, элбэхтик күлсэн-үөрэн, кэпсэтиһэн, дьон сүргэтэ өрө көтөҕүлүннэ. Ийэ тылбыт – биһиги норуоппут сүрэҕэ, дууһата, инники кэскилэ. Кини сайда туруохтаах, тулгуруйа туруохтаах. Маннык тэрээһиннэр сахабыт тылын күүһүн өссө күүһүрдэллэр, кинини харыстыырга уонна үйэтитэргэ биһигини барыбытын ыҥыраллар.

Ийэбит тыла сайда турдун, тулгуруйа турдун!