Ийэ тыл истиҥ,

Ийэбит иһирэх

Эйэҕэс эҥээрдээх

Элбэҕи этитэр.

А.Н.Чусовской аатынан Ньурбатааҕы лицей интернатыгар, Саха тылын нэдиэлэтигэр аналлаах»Ийэ тылбыт илгэтинэн» тыл оонньуута ыытылынна.

Сыала: Өбүгэлэрбит олохторун-дьаһахтарын, төрөөбүт төрүт тылбытын сөргүтүү, төрүт культураҕа уонна норуот историятыгар билиини тургутан көрүү, булугас өйү, толкуйдатар дьоҕуру сайыннарыы. Киин библиотека үлэһитэ Рея Петровна сахалартан бастакы тыл үөрэхтээҕэ, сахалыы суругу — бичиги төрүттээбит Семен Андреевич Новгородов туһунан билиһиннэрдэ.

Күндү ыалдьытынан буолла : СӨ Учууталларын учуутала, кыраайы үөрэтээччи, саха литературатын пропагандиһа, Ньурбаттан бастакы суруйааччы С.П.Федотов аатын, айар үлэтин үйэтитээччи Луиза Акимовна Канаева.

Луиза Акимовна оҕолорго олохтоох автордар хоһооннорун олус истиҥник ааҕан иһитиннэрдэ. Степан Федотов хоһооннорун бастыҥ билиитин иһин 11 кылаас үөрэнээччитигэр Николаев Уйгуҥҥа Луиза Акимовна Степан Федотов «Ыһыах» кинигэтин бэлэхтээтэ.

Үөрэнээччилэр икки хамаандаҕа арахсан күрэхтэстилэр. Оҕолор латыын алпаабытынан суруллубут тиэкиһи аахтылар, таабырын таайан,Өс хоһооннорго, сомоҕо домоххо, саха суруйааччыларын айымньыларын төһө билэллэрин, тылтан тылы таһаарыыга, инниттэн кэнниттэн аахтахха уларыйбат тыллары булууга күрэхтэстилэр.

«Кустук» хамаанда элбэх чуолкай эппиэти биэрэн кыайыылаах ааты ылла, «Эркин» хамаанда көхтөөхтүк кыттан биһирэбил бириискэ тигистилэр. Кыттыбыт оҕолор бары минньигэһинэн наҕараадаланнылар. Оҕолор төрөөбүт тылларын сайыннаралларыгар, сахалыы ааҕалларыгар интэриэс үөскүүрүгэр, сахалыы толкуйдара сайдарыгар баҕарабыт !

«Саха тыла сайдыан баҕарабын, сайдыа диэн бэркэ эрэнэбин…» диэн П.А.Ойуунускай тылынан тэрээһин түмүктэннэ. Ийэ тылгытын харыстааҥ, ийэ тылгытын таптааҥ!

Рея Васильева