Оҕо сахалыы ааҕар киинин иһинэн кулун тутар 4-5 күннэригэр интэриэһинэй кинигэлиин билсиһии ыытылынна. Бу тэрээһиннэргэ Ньурба 3№ алын сүһүөҕүн оскуолатын 4 кылааһын үөрэнээччилэрэ Оҕо уонна ыччат бибилэтиэкэтигэр ыалдьыттаатылар.

Биир дойдулаахпыт Владимир Егоров олус туһалаах, баай ис хоһоонноох «Таас тиит» остуоруйатын ааҕан саҕалаатыбыт. Буолаары буолан Аан дойдуга иһиллэр гына ааҕыы күнүгэр сөп түбэһиннэрэн оҕолор бэйэлэрэ доргуччу ааҕан тылларын эрчийдилэр.

Кинигэ ис хоһооно үөрэнээччилэр болҕомтолорун тардарын туһугар ойууларынан үлэ ыытылынна. Ойуулар сүрүн дьоруойдар майгыларын, сыһыаннарын бэркэ тириэрдэр буолан, оҕолор өйдүүллэригэр көмө буолла.

Бу остуоруйа саха норуотун үгэстэригэр, киһилии киһи буолан үүнэргэ иитэр-үөрэтэр суолтата улахан, онон төрөппүттэр оҕолорунаан тэҥҥэ ааҕан ырытыһалларыгар сүбэлиибит.

Ушканова Я.В.