Ахсынньы 7 күнүгэр Ньурбатааҕы М.С. Егоров аатынан 2 нүөмэрдээх оскуолатыгар «Күөх Ньурба-мин иэйэр куппар» (Моя Нюрба-колыбель вдохновения) хрестоматия-кинигэ сүрэхтэниитигэр Ньурбатааҕы киин бибилэтиэкэттэн Елена Ивановна Софронова биһиги ыҥырыллан тиийэн кыттыыны ыллыбыт.

Ньурба үөрэнээччилэригэр аналлаах «Моя малая Родина-Нюрбинский район» диэн бырайыак үлэлии сылдьарын бары билэбит. Бу бырайыак чэрчитинэн маннык ааттаах кинигэ, методичка уонна атлас эрдэ тахсан биһиги, бибилэтиэкэрдэр, үлэбитигэр эмиэ күүстээх көмө буоларын билинэбит.

Аны бу хрестоматия-кинигэ таҕыста. Алта олуктан турар: Ньурба поэттара, Ньурба суруйааччылара, Ньурбаны хоһуйбут Саха сирин поэттара уонна сурйааччылара, мелодистар уонна композитордар, худуоһунньуктар, «Ньурба уоттара» түмсүү хрестоматия-кинигэ 175 сирэйтэн турар. Халыҥ тастаах ХИФУ типографиятыгар 50 эрэ ахсаанынан тахсыбыт. Манна Ньурбабыт 42 талааннаах дьонун үлэлэрэ, айымньылара дьоһуннаах миэстэни ылбыт. Сорох хоһооннор нууччалыы тылбаастанан икки тылынан киирбиттэр. Аны хас олук кэнниттэн Размышляем над прочитанным…. баар. Холобурга аҕыйаҕы аҕалыым:

• Как вы понимаете заглавие стихотворения Н.И. Харитонова — Чуор «Дыхание родных мест»?
• В стихотворении Клары Васильевой «Колыбель любви-Нюрба» каково отношение поэтессы к родному краю? Найдите в этом стихотворении строки, помогающие понять чувство автора.
• Представьте себе, что интернет появился гораздо раньше, чем это произошло в реальности. Тогда герои литературных произведений могли бы завести себе странички (аккаунт) в социальных сетях или отдельные сайты. Подумайте, как могла бы выглядеть «страничка» героев из произведения Степана Федотова «Саҥа сиргэ».
• Егор Поликарпов музыкатыгар «Ньургуһуннар». Ньургуһун сибэкки сахаларга кыыс оҕо уобараһын кытта ыкса сибээстээх. Тоҕо, эһиги санааҕытыгар, саха омук тоҥ буору тобулу үүнэн тахсар сибэккини ытыгылыырый?
• Назовите молодых художников, пользующихся одним из видов гравюры «ксилография»?

Дьэ, ити курдук хас олук кэнниттэн 4-6 билиини бигэргэтэр тургутуктар… Астык да астык. Ыччаттарбытын иитэр-үөрэтэр учууталларбыт Ньурбабыт талааннаахтарын айымньыларын үйэтитиигэ, оҕоҕо тиийиэмтиэ гына, оҕо ылынарын курдук ырытан, оҥорон таһаарбыттара үчүгэйин! Хомолтото диэн ахсаана аҕыйах! Хата, сүрэхтэниигэ сылдьан киин бибилэтиэкэбитигэр, кэмчи да буоллар, тигистибит диэн үөрэбит.

Кинилэр кимнээҕий, бэлэмнээн-оҥорон, бэйэлэриттэн харчы хомуйан таһаарааччылар, маннык үтүө үлэни оҥорооччулар?2 нүөмэрдээх оскуолаттан: география учуутала, оскуола түмэлин үлэтин сүрүннээччи Васильев Геннадий Николаевич, нуучча тылын, литературатын учуутала Яковлева Лидия Васильевна, саха тылын уонна литературатын учуутала Степанова Ульяна Ивановна, Антоновка оскуолатыттан: Левина Изамира Иннокентьевна уонна Дьокуускай куораттан: логопед учуутал Харлампьева Мария Николаевна, педагогическэй билим кандидата, нуучча тылын, литературатын учуутала Васильева Розалия Семеновна.

Алта киһилээх хамаанда биир санаа тула түмсэн сүрдээх улахан үлэни оҥорбуттарын түмүгэр Ньурбабыт туһунан үйэлэргэ кэпсиир-сырдатар хрестоматия-кинигэ баар буолбута олус да үөрүүлээх. Кинилэр курдук, Ньурбаларын туһугар, тыган тырымныы сылдьар дьоннордуун, биир кэмҥэ олорортон, алтыһартан астынабыт эрэ.

Бүгүҥҥү түгэҥҥэ кыттыспыт, үтүө сонуну бастыкынан истибит дьон күн баҕабыт биир — «Күөх Ньурба-мин иэйэр куппар» (Моя Нюрба-колыбель вдохновения) хрестоматия кинигэ өйөбүл көстөн өссө элбэх ахсаанынан бэчээттэнэн тахсан Сахабыт сирин бары үөрэх кыһаларыгар тиийэн-тиксэн тапталлаах Ньурбабыт аатын дорҕоонноохтук ааттаттын! Айымньылаах хамаанда үлэтэ өссө кэҥээтин, инники былааннара, бырайыактара олоххо киирдин!

Ааҕааччыны кытта үлэлиир салааттан Маргарита Ноева.