Сэтинньи 15 күнүгэр, «Кэскил» уһуйаан бэлэмнэнии бөлөҕүн оҕолоругар остуоруйалаах сарсыарда үүннэ. «Волшебный рюкзачок» бырайыак аныгы саха остуоруйаларын тарҕатар сыаллаах түһүмэҕэр биллибэт соҕус, саҥатык айымньылары билиһиннэрии ыытыллар. 8Оҕолор бастаан презентация нөҥүө тайах туһунан билиилэрин хаҥаттылар. Онтон Римма Корякина — Хотууна «Көмүс көһүйэ остуоруйалара» кинигэтинээн билистилэр. «ТАЙАХ КУЛГААҔА» остуоруйаны хартыынанан көрдөрө-көрдөрө кэпсээһини чуумпуран олорон иһиттилэр. Тайах хайдах курдук улаханын, улаатымсыгын сөхтүлэр, ол эрэн кулгааҕа ыалдьыбытыгар аһыннылар. Тайах эмтэниитин туһунан бэрт интэриэһинэй остуоруйа оҕолор сэҥээриилэрин ылла. Ол кэннэ «Тайах уонна кутуйах» диэн ЧОХООН ханаалтан ойуулук көрөн үөрдүлэр-көттүлэр. Күндү төрөппүттэр, оҕо сахалыы остуоруйаттан үгүһү билэ улаатар, тылын саппааһа элбиир, онон кинигэ ааҕаргытын, көрдөрөргүтүн умнумаҥ. Ааҕыы — инники сайдыы тирэҕэ!

Ушканова Я. В.