Оҕону сиэр-майгы өттүнэн иитэргэ остуоруйа улахан төһүү күүс буолар. Остуоруйа үөрэтэр суолтата сүрдээх киэҥ.

Чуукаар нэһилиэгэр оҕолору кыра саастарыттан кинигэҕэ умсугутар, интэриэһиргэтэр сыаллаах, олохтоох бибилэтиэкэ иһинэн тэриллэн үлэлиир «Ааҕар дьиэ кэргэн» төрөппүт кулууба «Ымыычаан» уһуйаан иитиллээччилэригэр сыл устата араас сахалыы остуоруйалары билиһиннэрэр.

Бүгүн, тохсунньу 30 күнүгэр, «Ааҕар дьиэ кэргэн» төрөппүт кулууба былааннаммыт үлэтинэн Христина Софроновна «Ымыычаан» уһуйааныгар орто, улахан уонна бэлэмнэнии бөлөх иитиллээччилэригэр ыалдьыттаата.

Оҕолорго анаан «Көмүс көһүйэ остуоруйалара» диэн кинигэтиттэн «От күөх саһыл» туһунан остуоруйаны ааҕан баран, ис хоһоонун кэпсээн биэрдэ. Уһуйаан оҕолоро остуоруйаны кэрэхсээн иһиттилэр.

Клавдия Андреева