Аҕыйах ахсааннаах норуоттар ахсааннарыгар киирсэр эбэҥкилэр сыдьааннара, удьуордара Хатыыга эмиэ бааллар. Билиҥҥи туругунан, эбэҥки статуһун сүкпүт 30-ча киһи Хатыыга олорор, атыттар докуомуоннарын оҥорсо сылдьаллар, онон сылыктаатахха, элбиэхтэрин сөп.

Аныгы үйэҕэ кимтэн кииннээхпитин, хантан хааннаахпытын билэ сатыыр, төрүччүнү чинчийэр тоҕоостоох кэмнэргэ, Хатыыга удьуордарын билсээри, аймахтарын булаары, хааннара тардыһан, Сүлдьүкээр сэлиэнньэтин, Садын нэһилиэгин дьоно: сүбэни укта сылдьар кырдьаҕастар, эдэр эрчимнээх ыччаттар, удьуору утумнуур оҕолор, барыта 30 киһилээх делегация буолан доҕордоһуу-билсиһии көрсүһүүтүн тэрийдилэр.

Манна махтаныах этибит, нэһилиэк баһылыгар Вера Федоровнаҕа, билсиһиигэ маҥнайгы хардыыны оҥорон, дьонун-сэргэтин илдьэ кэлбитигэр. Эбэҥки диэн туох дьарыктаах, ханнык тыллаах-өстөөх, хайдах олорор норуотуй диэн билээри –көрөөрү төгүрүк остуол тэрилиннэ.

Библиотекаҕа Садын туһунан кэпсиир кинигэ быыстапката, ону таһынан, төрүччүнэн аймахтарын-урууларын булсар, сыдьааннарын билсэр кэпсэтии буолла. Манна Сүлдьүкээртэн сылдьар Николаева Тамара Владимировна төрүччүнү тутан олорон, урууларын, сыдьааннарын быһааран, хас да көлүөнэҕэ диэри сибээстэрин ырытан, көрдөрөн биэрдэ. Кэлбит дьон аймахтарын булан, удьуордарын ситимин салгыырга саҥа хардыылары арыйдылар.

Эбэҥки норуотун туһунан кэпсиир норуот маастардарын Н.В.Максимова, Н.В.Саввинова – СаНая быыстапкалара тэрилиннэ. Хас биирдии оҕуруонан тиһиллибит оһуор-мандар, хас биирдии сиик кинилэр олохторун-дьаһахтарын, үлэлэрин, оҕолорун кэпсиир искусство ураты дьиктитэ буолан биэрдэ. Хас да дьахтар киэргэлигэр, симэҕэр улар оҕуруонан оһуордаммыта сөхтөрдө. Кинилэргэ улар арчылыыр, харыстыыр көтөрдөрө эбит. Улары убаастыыллар, итэҕэйэллэр, маанылыыллар. Наталья Вениаминовна олус үчүгэйдик маастар кылааһыгар быһааран кэпсээбитинэн, улары бултуйдахтарына – улахан бырааһынньык, аймахтарын ыҥыран күндүлүүллэр, улар тугун да бырахпакка ас-таҥас оҥороллорун, оҥоһуктарын, киэргэллэрин көрдөрдө уонна сүбэ-ама биэртэлээтэ.

Норуот култууратын кэпсиир кэнсиэргэ эбэҥки тылынан ырыа-тойук, үҥкүү-битии, таҥастара-саптара уратыта кэлбит дьону сөхтөрдө. Хас биирдии хамсаныы, хас биирдии таҥаска оһуор мандар барыта кинилэр олохторун-дьаһахтарын, тугунан дьарыктаналларын, айылҕаҕа тапталларын туһунан кэпсиир. Онон, силиспитин-мутукпутун билэр кэм кэллэ. Хатыы-Сүлдьүкээр эбэҥкилэрин маҥнайгы хардыыта оҥоһулунна, силистэрэ-сибээстэрэ өссө дириҥээтэ. Олус улахан суолталаах тэрээһин буолла. Ыам ыйга буолар бакалдыын бырааһынньыгар нэһилиэк олохтоохторун ыҥырдылар. Маннык өбүгэлэрин чинчийэр, хантан хааннаахтарын билсэр, урууларын булсар үтүө көрсүһүүлэр салҕанан бара турдуннар. Ийэ ууһа буолан чэчирээҥ, аҕа ууһа буола тэнийиҥ.

Матрена Габышева, Мэҥэдьэк.