Ыам ыйын 12 күнүгэр Чуукаар нэһилиэгин олохтоох бибилэтиэкэтигэр Саха бастакы бэйээт дьахтара, биир дойдулаахпыт Варвара Потапова төрөөбүтэ 80 сылыгар, Ньурба оройуонугар Поэзия күнэ биллэриллибитин бэлиэтээн «Хоһоон — иэйии абылаҥа» диэн бэрт сэргэх тэрээһин буолан ааста.
Бибилэтиэкэр тэрээһиҥҥэ мустубут ыҥырыылаах ыалдьыттарга, оҕолорго ыам ыйын 13 күнүгэр Ньурба оройуонугар быйылгыттан саҥа бырааһынньык күнэ олохтоммутун туһунан иһитиннэрдэ.
Салҕыы Варвара Николаевна Потапова- Кутурҕан Куо олоҕуттан билиһиннэрэн поэтесса киһи ис туругун хамсааһынын, дириҥ, уйаҕас иэйиитин таба көрөн хоһуйарын, киһи дууһатын эгэлгэ хамсааһынын хоһоонунан этэр сатабыла ураты күүстээҕин, сонун тэҥнэбили уобарастааһыны үгүстүк туһанарын, айымньыларыгар түмүк санаата аһаҕастык хааларын туһунан иһитиннэрдэ. Тэрээһиммит ыалдьыттара « Уран кут » айар куттаах дьоммут Лидия Степановна, Маргарита Егоровна, Надежда Казакова Варвара Потапова туһунан олус сылаастык ахтан – санаан аастылар. Маргарита Егоровна Саха бастакы бэйээт дьахтарыгар Варвара Потаповаҕа анаабыт хоһоонун ааҕан иһитиннэрдэ.
……. Күөх Ньурба кыысчаана.
Күөх Ньурба хоһоонньут кыысчаана
Уйаҕас дууһаҕын ыллата
Көппүтүк алыптаах эйгэҕэ
Ураты санааҕын этинэ.
Биир суолу тутуһар сылларга
Биир халыып кэккэнэн хаамарга
Эн бэйэҥ суолгунан бараҥҥын
Көҥүллүк тыыныаххын баҕартыҥ.
Ис кутук дьалкыйар баалларын
Хорсуннук сурукка тиһэҥҥин
» Соҕотох хахыйах» буолаҥҥын
Үүммүтүк курустук чуҥкуйа.
Эн суолгун билигин солууллар
Күөх Ньурбаҥ кэрэчээн Куолара
Эн ааккын үрдүктүк туталлар Кэккэҕин хаҥата үүнэллэр. …
Егорова Маргарита Егоровна.
Ньурба. Чуукаар.12.06.2026.
Салҕыы Варвара Потапова бэйэтин айымньыларын уонна поэтессаҕа анаммыт хоһооннору Чуукаар орто оскуолатын 11 кылааһын үөрэнээччитэ Дария Данилова “Мин да оҕо этим”, Надежда Казакова «Балаҕан ыйа», Клара Васильева суруйбут «Варя чараҥар» хоһоонун Сардана Мартынова, “Поэтессаҕа” Антонина Яковлева суруйбут айымньытын Ульяна Иванова, ааҕан иһитиннэрдилэр.
Биһиги саха бастакы поэтессатын Варвара Потапова аатын үйэтитиигэ бэйэбит кылааппытын киллэрэн ыччаттарбытыгар хаалларыахтаахпыт диэн санааттан «Хоһоон — иэйии абылаҥа» көрсүһүүнү тэрийэн, ыччаттарга билиһиннэрэн, хоһоон аахтаран кини айар эйгэтин сырдатан тэрээһиммитин түмүктээтибит.
Саха маҥнайгы уонна уһулуччулаах хоһоонньута, Ньурбаттан төрүттээх, Варвара Николаевна Потапова үбүлүөйдээх күнүнэн уонна Ньурба улууһугар сылын аайы ыытыллар Поэзия күнэ олохтоммутунан эҕэрдэлиибин!
Клавдия Андреева
