Бүгүн, ахсынньы ый 2 күнүгэр, Ф. Г. Сафронов аатынан киин библиотека ааҕааччы саалатыгар, уопсастыбаннай — бэлэтиичэскэй таһаарыы “Кинилэринэн Саха норуота киэн туттар” Александр Гаврилович Габышев туһунан кинигэ сүрэхтэниитэ буолан ааста.
Александр Габышев үтүө аата — суола үйэтитиллэригэр, С. С. Габышев, Е. П. Антонов, А. А. Калашников сыралаах үлэлэрин уураннар, СӨ С. А. Новогородов аатынан “Айар” кинигэ кыһатыгар 800 экземплярынан бэчээттэнэн, Саха сирин судаарыстыбаннаһа сайдыытыгар олоҕун анаабыт Александр Гаврилович Габышев туһунан араас ыстатыйалар, ахтыылар уонна архыыбынай докумуоннар тиһиллэн, саха норуотун фондатын кэҥэтэн, ааҕааччы киэҥ эйгэтигэр таҕыста.
Александр Габышев кинигэтин туһунан биир дойдулаахтара, Ньурба оройуонун уонна Октябрьскай нэһилиэгин дьаһалталарын үлэһиттэрэ, общественность бэрэстэбиитэллэрэ тус санааларын этэн, ахтан — санаан аастылар. Ол курдук, Ньурба оройонун баһылыгын социальнай боппуруостарга солбуйааччыта Петрова Н. С., оройуон депутаттарын сэбиэтин бэрэссэдээтэлэ Михайлова Н. М., “Октябрьскай нэһилиэк” МТ баһылыга Корякин С. А., Ньурба куорат баһылыгын солбуйааччы Семенова И. Ф., Антоновкатааҕы көрдөрөр уонна үөрэтэр түмэл салайааччыта Захарова П. М., А. Г. Габышев аатынан “Биһик” оҕону сайыннарар киин сэбиэдиссэйэ Афанасьева В. Г., Октябрьскай нэһилиэк Бэтэрээннэрин Сэбиэтин бэрэссэдээтэлэ Тимофеев В. М. уонна бэтэрээн учуутал Тимофеева Н. М. ыалдьыттаатылар.

Тэрээһин кыттыылаахтара ааҕааччы саалатыгар туруоруллубут А. Г. Габышевка аналлаах быыстапканы көрөн, кини туһунан кинигэлэртэн, хаартыскалартан, архыып докумуоннарыттан бөдөҥ государственнай деятель олорон ааспыт олоҕун, үлэтин билистилэр.

Фотографии Айталины Камиловой.