Сааһырыы  да бардар,

Суохтуубут ол кэми,

Кэскили уһанар

Күргүөмнээх үлэни.

С. Спиридонова.

Алтынньы 29 күнүгэр Чаппанда нэһилиэгэр Комсомол төрөөбүт күнүн көрсө Аҕам саастаах көлүөнэ библиотекаҕа түмсэн, сылаас чэйдээх остуол тула олорон ааспыт кэмнэрин ахтан-санаан аастылар.

 «Алгыма» эбээлэр түмсүүлэрэ куруук көхтөөх, туохха барытыгар нэһилиэккэ, улууска ыытыллар тематическай киэһэлэргэ, бырааһынньыктарга көхтөөхтүк кыттыһар, саамай актыыбынай, сэбиэскэй кэм о5олоро буолан: октябренок, пионер, комсомол, партия оскуолатын ааспыт, чахчы патриотическай өйдөөх — санаалаах буола улааппыттара уонна оннук оскуоланы туораан, билиҥҥи олохторугар ол иитиилэрин ыһыктыбакка, тута сылдьар, биһиги убаастыыр дьоннорбут буолаллар.

Бу күн кинилэр библиотекаҕа кэлэн, урукку Комсомол кэмнэрин эргитэн «Комсомольскай субуотунньук» тэрийдилэр, кинигэ быыллаатылар, уборка онордулар. Библиотекам бэтэрээн аа5ааччыта, 86 саастаах 50 -сыллардааҕы комсомолка Зоя Васильевна Егорова бэҕэһээ «Кыталык» КД «Комсомол албан ааттаах суолунан» конференсьеҕа киирэн кыттыыны ылан тахсыбыта, ол туһунан сырдатыы оҥордо уонна Комсомол күнүнэн эҕэрдэтин тиэртэ.

Любовь Прокопьева урут Комсомол күнүн хайдах бэлиэтииллэрин, субботниктар тустарынан ахтан-санаан ааста. Дьо5урдаах эбээлэрбит Акулина Данилова, Зоя Егорова, Прасковья Федорова, Нина Егорова саҥа тикпит панноларын аҕалан комсомол төрөөбүт күнүнэн быыстапкаҕа, туруордулар уонна урукку «Комсомол кэминээҕи плакат» быыстапката оҥоһулунна.

 Түмсүү салайааччыта Паша Никифоровна «Тыл оонньуута» тэрийэн ыытта.

Уус-уран салайааччы Саргылана Семенова тэрийиитинэн уостан түспэккэ ылланар, комсомол гимнэ буолбут «Эн, комсомол мин дьолум» , бары сөбүлээн ыллыыр «Саха үҥкүүтэ» ырыалары үөрэн — көтөн ис дууһаларыттан ыллаатылар.

«Комсомол мин олохпор» тиэмэҕэ аан бастаан комсомол кэккэтигэр хайдах киирбиттэрин, ол кэмнэрин ахтан-санаан, кэпсэээтилэр: Татьяна Николаева, Любовь Прокопьева, Прасковья Федорова, Зоя Егорова. Олус интэриэһинэй, көрдөөх да түгэннэрин ахтан-санаан ыллылар. Бары бииргэ, биир санаанан, көхтөөхтүк кытыннылар, бүгүн бу күнү көрсө Антоновкаттан Сеялова Анастасия Дмитриевна кэлэн кыттыыны ылла.

Сэбиэскэй кэм саҕана комсомоллар хамсааһыннара  күүстээҕэ, бу бүгүҥҥү күҥҥэ да бары кэлэн кыттыбыттарыгар да көстөр. Күндү комсомол бэтэрээннэрин барыгытын эҕэрдэлиибит. Бу курдук өрүү эдэрдии, эрчимҥитин ыһыктыбакка сылдьыҥ, бэйэҕит холобургутунан сиэннэргитигэр сүбэ — ама буолуҥ, чэгиэн доруобуйаны баҕарабыт.

Е. С. Тимофеева

Чаппанда.