Бүгүн биһиги дьиэбитигэр Киин библиотека үлэһиттэрэ Васильева Р. П., Николаева Г. Е. Комсомол күнүгэр аналлаах тэрээһини сүрдээх сэргэхтик ыытыстылар. Тэрээһин олохтоохтор бэлэмнээбит «Комсомол төлөннөөх сүрэҕэ» литературнай-музыкальнай монтажтан саҕаланна. Салҕыы ыалдьыттарбыт Комсомол историятын кэпсээтилэр, дьон билиитин викторина ыытан чиҥэттилэр, эдэр сааһы эргитэн ааспыт үйэ ураты суолталаах түгэннэрин туһунан ким ордук билэригэр күрэх ыыттылар. Олохтоохтор олорон биэрбэтилэр. Сөптөөх хоруй баар буолан истэ. Кыттыбыт дьоҥҥо ыытааччылар минньигэс бириис туттаран үөрүү — көтүү үгүс буолла. Түмүккэ, Рея Петровна Хорула учуутала Кононова В. Д. суруйбут «Хаарылык Дуунньа», олоххо чахчы буолбут сэрии оҕото Иванова Е. М. эрэйдээх-буруйдаах олоҕун туһунан кэпсээни дорҕоонноохтук ааҕан иһитиннэрдэ. Кыра оҕо дьылҕата истээччилэри барыларын долгутта, тулаайах кэриэтэ кыыс олоххо дьулуура барыбытыгар холобур буолар. Кэпсээн дьоруойа билигин ытык сааһыгар тиийэн этэҥҥэ сылдьарыттан үөрдүбүт.

Куличкина М. К.

(Ыстатыйа, видеоматериал

уонна хаартыскалар НМДИПИ телеграм ханаалыттан https://t.me/gbu_nmdipi)