Ньурбатааҕы кииннэммит бибилэтиэкэ ситимин уонна «Ньурба уоттара» түмсүү үлэтин былаанынан кулун тутар 20 күнүгэр Ньурба олохтоохторо, айар-тутар дьоно-сэргэтэ Киэҥ Ньурба сытыы бөрүөлээх суруйааччыларын ГАЛИНА ТОМСКАЯ-АЙЫЫНАНЫ, ДМИТРИЙ ПОНОМАРЕВ-ДЬОЛУОЛААҔЫ, ОЛЬГА СОФРОНОВА-СУҺУМУ, АЛЕКСАНДР АЛЕКСАНДРОВ-CAXCA TAPЫ, АЛЛА СЕЛЬТЮКОВА -АЙААЛЛАНЫ кытта «Иһирэх иэйиилэр тиксиһэр кэмнэрэ» диэн истиҥ-иһирэх көрсүһүүгэ бэрт сэргэх кэпсэтиини таһаардылар.
Ньурба сириттэн аан маҥнай СССР суруйааччыларын Сойууһугар Степан Прокопьевич Федотов 60 сыллар ортолоругар киирбитинэн кинини БАСТАКЫ суруйааччыбыт быһыытынан билинэбит. Кини кэнниттэн Саха сирин суруйааччыларын Сойууһугар 18 айар куттаахтарбыт киирэн билиҥҥи күҥҥэ Ньурба 19 идэтийбит суруйааччылаахпыт. Бүгүҥҥү кэпсэтиигэ Москва куораттан дойдутугар кэлэ сылдьар Айыына Томская, «Ньурба уоттарын» салайааччыта Күндээдэттэн Дмитрий Дьолуолаах, Антоновкаттан Ольга Суһум, Александр Саха Тар уонна Хорулаттан төрүттээх Ньурбаҕа олорор Айаалла бииргэ түмсэн айар үлэлэрин кэпсээн, ыйытыктарга хоруйдаан мустубут дьону улаханнык үөртүлэр.
СӨ Национальнай бибилэтиэкэтин научнай чинчийэр институтун сүрүн бибилэтиэкэрэ Маргарита Дмитриевна Татаринова дойдутугар кэлэ сылдьар кэмигэр сөп түбэһиннэрэн көрсүһүүгэ Ньурба оройуонун култуураҕа департамена уонна АГИКИ үрдүк үөрэх кыһата холбоһуулаах» Култуура+үөрэҕирии» бырайыактарыгар Ньурба суруйааччылара инникитин үлэлэһиэхтэрин, дойдубут туһугар литература, култуура сайдыытыгар кэскиллээх хамсааһыннары таһаарыахтарын сөбүн тоһоҕолоон бэлиэтээтэ. «Ньурба уоттарын» өттүттэн сахаларга дьахталлартан бастакы поэтесса Варвара Потапова төрөөбүт күнүн, ыам ыйын 13 күнүн, «Ньурбаҕа поэзия күнүнэн» ылынарарга, пааркаҕа памятник тутарарга, «Ньурба күһүнүн» көрсө Степан Федотов Дьиикимдэҕэ Дьөттүн алааһын, Варвара Потапова Ыраах Убайааҥҥа турар түмэл дьиэтин сөргүтэргэ, Ньурба куоракка суруйааччылар сквердэрин оҥоруу диэн этиилэрин сэргэ Ньурбатааҕы драма тыйаатырын артыыстара ВАРВАРА ПОТАПОВА ААТЫНАН ГОСУДАРСТВЕННАЙ БИРИЭМИЙЭ олохтонорун ситиһэргэ уонна биһиги талааннаах биир дойдулаахпыт дьахталларга бастакы поэтесса буоларын ситиспит, саха норуотугар В.Потапова хоһооннорун бастакынан иһитиннэрбит, билиһиннэрбит сахалар тапталлаах артыыскабыт Зоя Петровна Багынанова В.Потапова аатынан бириэмийэни БАСТАКЫНАН ыларыгар баҕа санааларын мустубут дьон бары көхтөөх ытыс тыаһынан биһирээтилэр. Маардааҕы орто оскуола учуутала, «Дьөҥкүүдэ кыталыктара» оҕо норуодунай фольклор ансаабылын салайааччыта Саргылана Петровна Федорова Айаалла «Күн сирин көмүскэлэ-Үс ини-бии бухатыыр» олоҥхото билиҥҥи оҕо-ыччат өйдүүрүн, ылынарын курдук суруллубутун хайҕыырын уонна бу олоҥхону туруорарыгар айааччыны кытта бииргэ үлэлиэн баҕарарын этэн суруйааччыттан бииргэ үлэлииргэ сөбүлэҥ ылла. Ньурба куорат 2 нүөмэрдээх оскуолатын учуутала, киин бибилэтиэкэ улахан доҕоро Тимофеева Айтилля Анатольевна быйыл Д.Н.
Пономарев-Дьолуолаах «Биһик» сэһэниттэн быһа тардыыны үөрэнээччилэригэр туруоран театральнай көрүү күрэххэ улахан ситиһиилэммитэ, бу туруорууга оскуола 40 оҕото кыттыыны ылбыта. Кыыһа, Ньурбатааҕы техническэй лицей үөрэнээччитэ Анжелина Тимофеева Дьолуолаах «Биһигэр» уруһуйдаан-ойуулаан СӨ Национальнай бибилэтиэкэ үлэһитэ Сивцева Т.Н. «Дети-авторы» диэн электроннай кинигэни бэлэмнээһин бырайыагар кыттаары сылдьар. Бүгүҥҥү тэрээһиҥҥэ кэлэн Анжелина сэһэҥҥэ хайдах үлэлии сылдьарын кэпсээһинэ суруйааччыны эрэ буолбакка барыбытын долгутта. Маннык сахалыы сиэрдээх, сахалыы суруйуулары сэргиир оҕолордоох буоллахпытына сахабыт литературата инникитэ кэскиллээх диэн санаа киһини кынаттыыр. Суруйааччылары кытта көрсүһүү инникитин да тэриллэ туралларыгар, ордук оскуола үөрэнээччилэрин, эдэр ыччаты кытта көрсүһүүлэри тэрийии тоҕоостооҕун, оҕолорго аналлаах кинигэ олохтоох ааптардартан суоҕун мустубут дьон-сэргэ бэлиэтээтэ. Дмитрий Николаевич Пономарев, «Ньурба уоттарын» айар-суруйар талааннаахтара оҕолорго анаммыт хомуурунньук бэлэмнээбиттэрин, үбүлээһинэ билиннэ да кинигэ тахсарын иһитиннэрдэ. Галина Егоровна Томская хоһоон суруйуутунан саҥа дьарыктанар 18-тан уеһэ саастаах дьоҥҥо анаан сүбэ биэриэн, маастар кылаас оҥоруон сөбүн биллэрдэ.
«Иһирэх иэйиилэр тиксиһэр кэмнэрэ» истиҥ-иһирэх көрсүһүүгэ кэлбит дьон түмүгэр суруйааччылартан илии баттааһыннаах кинигэлэрин уонна олунньу ыйга төрөөбүтэ 90 сылын бэлиэтэммит бастакы суруйааччыбыт С.П. Федотов аймахтара «Айар» кинигэ кыһатыгар таһааттарбыт халандаардарын, кинигэҕэ бэлиэ гынан туттуллар закладкаларын суруйааччы сиэн балта Валентина Федотоваттан бэлэх туттулар.
Көрсүһүү түмүгэр, мустубут дьон-сэргэ тэрийээччилэргэ киирбит этиилэри сурукка тиһэн салалтаҕа тириэрдэллэригэр, бибилэтиэкэ ситимэ үөрэҕирии салалтатын кытта биир сүбэнэн, айар-суруйар, литератураны сэргиир оҕолорго саҥа үлэ көрүҥүн сөргүтэргэ ирдэбил туруордулар. Ньурба литературатын сайдыытыгар үтүө баҕа санаалары эттилэр.
Суруйааччыларбытын субу тутан олорон истэр-билэр сахалыы саҥалаахпытынан, саха буоларбытынан киэн туттуу санааҕа тириэртэ. Бэһиэн араас хайысханан үлэлиир, суруйуу араас көрүҥнэрин сатабыллаахтык баһылаабыт дьоммут билиилэрэ-көрүүлэрэ, саҥалара-иҥэлэрэ киһи истэ олоруон эрэ курдук. Кинилэр айар-суруйар үлэлэрин таһынан Саха сирин үрдүнэн суруйааччылар Сойуустарын үлэтин торумнаһар, Ньурба айар талааннаахтарын сүрүннүүр, эдэр ыччакка айар дьоҕурдаахтары көрдүүр, сүбэ-ама оҥорор күн солото суох дьарыктаахтар.
ААН ДОЙДУТААҔЫ ПОЭЗИЯ КҮНҮН КӨРСӨ ҮТҮӨ ТҮГЭНИ БЭЛЭХТЭЭБИТ КИЭН ТУТТАР СУРУЙААЧЧЫЛАРБЫТЫГАР: ГАЛИНА ЕГОРОВНА ТОМСКАЯ-АЙЫЫНАҔА, ДМИТРИЙ НИКОЛАЕВИЧ ПОНОМАРЕВ-ДЬОЛУОЛААХХА, ОЛЬГА ВАСИЛЬЕВНА СОФРОНОВА-СУҺУМҤА, АЛЕКСАНДР ПЕТРОВИЧ АЛЕКСАНДРОВ-CAXCA TAPГА, АЛЛА РУСЛАНОВНА СЕЛЬТЮКОВА -АЙААЛЛАҔА ИДЭҔИТ КҮНҮНЭН ИТИИ ИСТИҤ ЭҔЭРДЭ! ҮӨРҮҮНҮ ЭТЭР, КӨҤҮЛҮ ТУОЙАР, САЙДЫЫНЫ САЛАЙАР, ДЬОЛ КЫЫМЫН ЫҺАР, ТАПТАЛ ЫРЫАТЫН ЫЛЛАТАР АЙЫМНЬЫЛААХ ОЛОХХУТ УРУЙДАНА ТУРДУН!
