2012 сыллаахтан Ил Дархан Егор Борисов ыйааҕынан биһиги Өрөспүүбүлүкэбитигэр, Саха сирин норуоттарын уус-уран оҥоһуктарын, искусстволарын араҥаччылыыр, сөргүтэр уонна сайыннарар сыаллаах норуот маастарын күнэ бэлиэтэнэр.
Ньурбатааҕы Федот Сафронов аатынан киин бибилэтиэкэбитигэр Маастар күнүн бэлиэтээн Ньурба улууһун уус уран оҥоһуктарыгар маастарын САРГЫЛАНА МИХАЙЛОВНА ХАРИТОНОВА «СЫРДЫК СЫДЬААЙ СУҺУМА» оҥоһуктарын быыстапкатын сэргэ кыбытык тигиигэ маастар кылааһын ыытааһына олус сэргэхтик ааста.
Саргылана Федорова күн сирин Мэҥэ Хаҥалас Даркылааҕар (Чыамыйыкыга) көрбүтэ. Ойор-тэбэр оҕо сааһа, эдэр эрчимнээх кэмнэрэ тапталлаах дойдутун кэрэ айылҕатын суугунугар куустаран ааспыта. Орто оскуоланы бүтэрэн биир сыл олохтоох балыыһаҕа санитарканан үлэлээбитин кэннэ Дьылҕа хаан ыйааҕа Ньурбаҕа сирдээн аҕалбыта. 1983 сыллаахха Маардааҕы СПТУга фотограф идэтигэр үөрэнэ киирбитэ. Үс сыл устата үөрэнэр кэмигэр Маалыкай ыччата, суоппар идэтигэр үөрэнэ сылдьар Харитонов Андрейдыын доҕордоһон, таптаһан ыал буолан Иэримэ дьиэ иэйиэхситэ буолан түөрт оҕону төрөтөн-улаатыннаран-сүһүөхтэригэр туруоран алаһа дьиэлэриттэн көтүттүлэр. Ыал ийэтин, эбээтин, Андрей Семенович кэргэнин, Харитоновтар аҕа уус кийииттэрин, саҥастарын быһыытынан хаһаайка бастыҥынан кэпсэлгэ сылдьар. Оҕолоро Ньурбанан, Дьокуускайынан, Хабаровскайынан олохсуйан аҕа-ийэ ууһун тэнитэллэр, үгүс дьоннуун сэргэ олох дьолун сырсаллар.
Бүгүн ийэлэрин арыаллаан аттыгар баар Ньурба култууратын эйгэтин үлэһиттэрэ кыыһа Дария, күтүөтэ Роман Чумпуровтар тэрээһини олус тупсардылар. Күтүөт Роман Чумпуров ырыатынан мустубут Далбар Хотуттар сүргэлэрин күүскэ көтөхтө. Талба талааннаах Мария Додохова, Октябрина Григорьева кэрэ куоластарынан ырыалара сахалыы салгыны сайа охсон киллэрдэ.
Ыал ийэтин күннээҕи түбүгүн кытта тэрилтэҕэ үлэтинэн олорбут Саргылана Михайловна айар-иистэнэр эйгэҕэ хотуулаахтык, айымньылаахтык кииритэ 2015 сыллаахтан саҕаламмыта. Бу сыл куйаар ситимин нөҥүө КЫБЫТЫК ТИГИИГЭ САЙЫЫ КУТА диэн айар ааттаах СТАРОСТИНА АНИСИЯ ПЕТРОВНАТТАН үөрэммитэ. «Арыллыы» түмсүүгэ киирэн билигин Ньурба сирэ киэн туттар панноларын үлэтигэр кыттыһан кылаатын киллэрсибит үтүөлээх. 2020 сыллаахха «Ньурба улууһун уус уран оҥоһуктарын маастара» үрдүк аат иҥэриллибитэ.
Ааҕар саалабытыгар Саргылана Харитонова үгүс элбэх үлэтиттэн бэрт кыра чааһа турдар да сырдык сыдьаай суһумунан мустубут дьону сылаастык кууста.
Дьоро күнүнэн Саргылана Михайловнаны оҕолорун сэргэ Ньурба оройуонун Култуураҕа уонна ыччат политикатыгар департаменын аатыттан СӨ култууратын туйгуна, Ньурба култууратын бочуоттаах үлэһитэ, норуот айымньытын салаатын сүрүннүүр үлэһитэ Розалия Васильевна Тартакынова, Ньурбатааҕы кииннэммит бибилэтиэкэ ситимин директора, СӨ ыччат политикатыгар туйгуна Юлия Андреевна Васильева, Дьүөгэлэрэ, биир идэлээхтэрэ, Ньурба уус уран оҥоһуктарга маастардара Наталья Федотовна Трофимова, Домна Егоровна Петрова, Розалия Никитична Лазарева, Бүлүүттэн ыалдьыт Татьяна Дмитриевна Лукина истиҥ эҕэрдэлэрин анаатылар.
Идэ оҥостубут кыбытык тигиигэ үөрэтэн бу күн Ньурба Далбар Хотуттара, Кэрэ Куолара иннэлик тиктэн бэйэлэригэр кэрэ бэлэх оҥостон, араас талааннаах дьоннуун маннык тэрээһиннэр тиһигин быспакка ыытылла туралларыгар баҕа санааларын этэн тарҕастылар.
Ньурбатааҕы киин бибилэтиэкэ ааҕааччылыын үлэлиир салаата.
