Сып-сырдык ыралаах дууһалаах,
Сүрэхпэр өрөгөй ырыалаах
Төрөөбүт мин дойдум, Ороһум,
Төлкөлөөн үөскэппит Кустугум.
Уйбаан Ороһуунускай
Айар-суруйар талаанынан биһирэнэн, киэҥ эйгэҕэ аатын тэлбит бэйиэт, суруналыыс, кыраайы үөрэтээччи, Арассыыйа географическай уопсастыбатын чилиэнэ, СӨ култууратын үтүөлээх үлэһитэ, СӨ суруйааччыларын сойууһун чилиэнэ, ,,Гражданскай килбиэн,, бэлиэ туһааннааҕа Иван Еремеевич Иванов- Ороһуунускай төрөөбүтэ 80 сылыгар аналлаах,,Кэриэс тылым туолбут, кэрэ бэлиэ буолбут…»тэрээһиҥҥэ О.Д.Федорова аатынан модельнай библиотека ыҥырыытынан Ньурбаттан 7 буолан баран кэллибит.
Үөһээ Бүлүү администрациятыттан А.М.Уларова,Ороһу нэһилиэгин баһылыга А.В.Антонов, Ороһуунускай кэргэнэ Степанида Михайловна, кыргыттара Гуннара уонна Тюркана, Норуодунай поэт Саргылана Гольдерова-Саргы Куо ыҥырыылаах күндү ыалдьыт буолан кэлбиттэр.
«Ньурба уоттара» түмсүүттэн, бииргэ үлэлээбит,алтыспыт CӨ норуодунай артыыһа Борисов Б.И. Ороһуунускай Ньурба театрыгар директорынан үлэлээбит кэмнэрин ахтыы оҥордо уонна Ньурба театра 50 сылыгар оҥоһуллубут фотоальбомы Ороһу библиотекатыгар бэлэхтээтэ. Уйбаан Ороһуунускай «Эйэ иһин куоластааҥ» хоһоонун аахта.
Чаппанда музейын үлэһитэ Сидорова Т.Д.Ороһуунускай Чаппанда оскуолатыгар үлэлии сылдьан Н.Т.Степановы кытта алтыспытын кэпсээтэ.И.Е.Иванов-Ороһуунускай автографтаан 20-чэ кинигэ бэлэхтээбитин ,үлэлээбит оскуолатыгар анаан үс хоһоону суруйбут.»Оскуолам,Чаппандам барахсан»хоһооно оскуола гимнэ буолан ылланарын билиһиннэрдэ.
Луиза Канаева Саргылана Гольдерованы Норуодунай поэт буолбутун эҕэрдэлээн баран,Ороһуунускай хоһоонун олус истиҥник ааҕан дьон махталын ылла.
«Ньурба уоттарыттан» Т.Шестаков уонна Г.Монастырев Ороһуунускай тылыгар матыып суруйбут ырыаларын ыллаан иһитиннэрдилэр.Маартан Анна Абишева Ороһуунускай хоһоонун аахта,олус астынан кэллэ .
Ороһу модельнай библиотеката Ороһуунускай 80 сааһыгар ыыппыт хоһоон ааҕыытын күрэҕэр Канаева Луиза Акимовна 1 бириистээх миэстэҕэ тиксэн ,3 тыһыынчалаах сертификатынан наҕараадаланна.Малыкайтан Саввинова Алиана 2 миэстэ буолан, харчынан бириэмийэлэннэ.
Ороһу администрациятыгар,кулууп үлэһиттэригэр,библиотекарьга Жанна Семеновнаҕа олус истиҥник көрсүбүттэригэр махтанабыт!
Иван Еремеевич Иванов- Ороһуунускай Күөх Ньурбаҕа айар дьоҕурун айымньылаах аартыгынан өрө дабайан, эдэр сааһын күүрээннээх күннэригэр олоҕун үтүөҕэ анаабыт сырдык суолун кэнчээри ыччат ахта-саныы сылдьыа, ытыктыа, үтүө холобур оҥостуо!
