Өрөгөйдөөх Улуу Кыайыы 81 сылын көрсө сэрии кыттыылааҕа, аатырбыт оһуохайдьыт, алыптаах тыллаах алгысчыт Василий Васильевич Степанов – Хомпуоһап Баһылай 100 сылыгар анаан, кини аатын сүгэр норуодунай тыйаатыр аан бастаан туруорбут Лоокуут уонна Ньургуһун испэктээгин 75 сыл буолан баран, Мэҥэдьэктээҕи норуодунай тыйаатыр сыанатыгар режиссер Милена Егорова аныгы көрүүтүнэн, эдэр режиссерскай хараҕынан саҥалыы турда, көрөөччү биһирэбилин, ытыс тыаһын дохсунун ылла.
2008 сылтан Мэҥэдьэктээҕи норуодунай тыйаатыр В.В.Степанов –Хомпуоһап Баһылай аатын сүгэр.
Милена Егорова, режиссер, ураты көрүүтүнэн Хомпуоһап Баһылай олоҕун, дьонун-сэргэтин, үлэтин, сэриигэ сылдьыбытын барытын сыанаҕа олус итэҕэтиилээхтик, кырдьык даҕаны диэх курдук, көрөөччү биир тыынынан көрөрүн ситистэ.
Режиссер үөрэхтээх, талааннаах кыыспыт Милена Егорова 75 сыл буолан баран, Тимофей Сметанин былыргыттан истиҥ иэйии-таптал туһунан «Лоокуут уонна Ньургуһун» испэктээги аныгылыы, саҥалыы туруорда.
Көрөөччүлэр ортолоругар аан бастакы Баһылай Хомпуоһап туруорбут «Лоокуут уонна Ньургуһун» испэктээгин көрбүт дьон, бүтэһигэр бу саҥа туруорууну астыммыттарын, уруккуну кытта тэҥнээн көрбүттэрин, режиссер үлэтэ чаҕылхайын бэлиэтээтилэр.
Испэктээк саҕаланыан иннинэ, В.В.Степанов кыыһа мелодист, ырыаһыт, элбэх ырыа ааптара Александра Иванова аҕатын туһунан истиҥ ахтыы оҥордо, оҕо сааһын санаан ылла. Баһылай Хомпуоһабы кытта сыанаҕа артыыстаабыт, араас испэктээккэ оонньообут, сыана бэтэрээнэ, норуодунай тыйаатыр артыыһа Тамара Дмитриева В.В.Степанов хайдах курдук үчүгэйдик оруолларга оонньуурун, ханнык испэктээхтэргэ кыттыбытын ахтан-санаан ааста. Ону сэргэ маҕаһыыҥҥа бииргэ үлэлээбит кэллиэгэтэ, Иванова Ольга Иннокентьевна, Василий Васильевич, кини кэргэнин Мария Сергеевна туһунан кылгас эрээри, олус иһирэхтик кэпсээтэ.
«Лоокуут уонна Ньургуһун» испэктээххэ араас үлэҕэ үлэлиир, артыыс идэтэ суох, саҥа оонньуур эдэр ыччат кыттыыны ылла. Олус итэҕэтиилээхтик оонньоон, сыанаҕа саҥа тахсар артыыстар Харысхан Яковлев, Анатолий Аммосов дьон хайҕабылын, биһирэбилин ыллылар. Ол курдук, сүрүн оруолларга Лоокуут оруолун олохтоох дьаһалтаҕа сир үлэһитинэн үлэлиир Харысхан Яковлев, Ньургуһун — култуура киинин дириэктэрэ Софья Федотова, Баһыкка- физкультура учуутала Валентин Николаев, Далбардаах – сыана бэтэрээнэ Анастасия Анисимова, Нараҕан – култуура киинин уус-уран салайааччыта Манчаары Ксенофонтов, Мөлчөс – култуура киинин звукооператора Дмитрий Попов, Мардьааһай – АБДь бэтэрээнэ, тыа хаһаайыстыбатын үлэһитэ Анатолий Аммосов оонньоотулар.
Хас испэктээх аайы саҥаттан саҥа талааннар арылла тураллара көрөргө астыгыан. Мэҥэдьэктэр бу да сырыыга ураты, сонун испэктээги туруоран нэһилиэк дьонун сэргэхситтилэр, эдэр талааннар дьону-сэргэни астыннардылар.
Матрена Габышева, Мэҥэдьэк
