Маардааҕы кииннэммит модельнай бибилэтиэкэ быйыл үһүс сайынын оҕолорго аналлаах «Сахалыы ааҕабын, суруйабын» диэн куруһуок үлэтин киэҥник ыыттылар. Манна оскуолаҕа киириэх иннинээҕи саастаах оҕолортон саҕалаан, алын уонна орто сүһүөх үөрэнээччилэрэ төрөөбүт тылларын баһылыыллар.

Сайыҥҥы сынньалаҥы туһалаахтык атаарыы – хас биирдии төрөппүт сүрүн соруга. Маардааҕы бибилэтиэкэ үлэһиттэрэ бу боппуруоһу бэрт сөпкө быһаарбыттар: оҕо сааһыгар сайыҥҥы кэмҥэ оонньуу нөҥүө төрөөбүт тылы иҥэрии – олус суолталаах.

Дьарык күн аайы үс чаас устата ыытыллар уонна барыта сахалыы тылынан барар. Куруһуокка оҕолор сахалыы алпаабыты кытта билсэллэр, ааҕарга-суруйарга үөрэнэллэр.

Ол эрээри, дьарык хаһан да биир кэмнээх, зеленка курдук уйгуурдук ааспат. Тэрийээччилэр оҕолор салгыбаттарын туһугар араас ньыманы туһаналлар:

• сахалыы остуол оонньууларынан дьарыктаныы;

• саха култууратын кытта билсиһии;

• хамсаныылаах оонньуулар;

• тиэстэнэн уонна пластилиннан оҥоһуктар;

• айылҕаны, кыыллары, үүнээйилэри билиһиннэрии.

«Оскуолаҕа киириэх иннинээҕи саастаах оҕолор пластилиннан оҥороллорун, уруһуйдуулларын ордук сөбүлүүллэр. Ону таһынан, куруһуок таһыгар тахсан, оҕо былаһааккатыгар араас көрдөөх эстафеталары, квестары, футбол оонньууларын тэрийэбит», – диэн куруһуок салайааччылара кэпсииллэр.

Куруһуок үлэтэ атырдьах ыйын ортотугар түмүктэнэр. Бу кэмҥэ оҕолор оскуолаҕа бэлэмнэниилэрэ, сорохтор куоракка, улуустарга барар кэмнэригэр сөп түбэһэр. Үгэс быһыытынан, бүтэһик дьарыкка оҕолорго сайын тухары дьарыктаммыттарын туоһулуур сертификат уонна сэмэй бэлэхтэр туттарыллаллар.

Бу үлэ сүрүн сыала-соруга — хас биирдии оҕо кыра сааһыттан бэйэтин төрүт тылын, култууратын билэригэр, дьиэ кэргэҥҥэ сахалыы кэпсэтэригэр уонна, саамай сүрүнэ, төрөөбүт дойдуларыгар патриот буола улааталларыгар олук ууруу буолар.

Ольга Иванова