Май Емельянов Дьаархан 4 кылаастаах оскуолатын бүтэрэн баран 5-6-7 кылаастарга Маар оскуолатыгар интернаакка олорон үөрэнэр. Ол кэннэ үөрэҕин салҕыы Ньурба 1 № оскуолатыгар үөрэнэр. Бу оскуолаҕа үөрэнэр кэмигэр кини инники олоҕун сүнньүн быһаарар түгэн тосхойор. Фотокружокка дьарыгыран хаартыска түһэрэргэ, бэчээттииргэ үөрэммитин таһынан милиция идэтин пропагандалыы оскуолаҕа бэсиэдэ ааҕаллар. Ону тэҥэ ЮДМ (юные дружинники милиции) оҕолору командаҕа киллэрэн милииссийэ идэтигэр сыһыаран бараллар. Май Емельянов Маардааҕы СПТУ-га үөрэнэр кэмигэр, үөрэнэр дьиэлэрэ умайан хаалан курсааннары мас кэртэрэн, саҥа үөрэнэр дьиэ туттараллар. Емельянов Майы хаһыат таһаара үөрүйэҕин иһин мас үлэтиттэн босхолууллар. Уол тэҥнээхтэринээн бииргэ сылдьаары аккаастанан көрөр да ким эрэ эмиэ хаһыат таһаарыахтаах буоллаҕа. Биир уолу уруһуйдьутунан көрдөһөн ылан хас күн аайы күргүөм үлэ хаамыытын сырдатар хаһыат таһаараллар. Күннээҕи үлэни хаартыскаҕа түһэрбитин киэһээ кэлэн бэчээттээн таһаарар. Өссө ити дьарыга Ньурбаҕа дьыала арыйыытыгар кытта көмөлөһөн турар.
Үөрэх салҕанар.
ВЮЗИ Магаданнааҕы филиалын «правовед» специальнаһын бүтэрэр. Дьэ уонна ананан барбыт сирдэригэр үчүгэйдик үлэлээн, хайҕанан тиһэҕэр МОП МВД РС(Я) начальнигын солбуйааччытынан үлэлээн милииссия полковнига званияланан пенсияҕа тахсар. Ведомственнай отделтан үрдүк ситиһиилээх үлэтин иһин 5 мэтээлинэн, ПВС ЯАССР Почетнай грамотатынан, именной Макаров бэстилиэтинэн наҕараадаланар.
Бииргэ үөрэммит оҕолоро үрдүкү дуоһунастарга, суукка үлэлээбит буоллахтарына, кини норуоту кытта алтыһар ымпыктаах, арыт сэрэхтээх да идэтин талан үтүө суобастаахтык үлэлээн аастаҕа. Били хаартыска түһэрэр дьарыга үлэтигэр эрэ буолбакка үлэлээн, бултаан да ааспыт сирдэрин кэрэ көстүүтүн түһэрэн быыстапка туруоран дьон-сэргэ сэҥээриитин ылла.
Толкуйдаан көрдөххө диэххэ дуу, эбэтэр кини айымньылара киһини толкуйдатар диир ордуга буолуо: үс тутул кэмин анааран көрбүт, бэйэбит аттыбытыгар баар дьону айымньытыгар киллэрэн хаалларбыт патриотическай тыыннаах, саха сиэрин тутуһар булчут олоҕун да сэһэннэрэ кэнчээри ыччакка олус туһалаах.
Кинигэлэрэ:
- Соһуччу көрсүһүү.
- Тымыр — сыдьаан, икки аҕа ууһун төрүччүтэ.
- Буулдьа суола.
- Сулустар суһумнара.
- Бүтэһик ботуруон
СӨ суруйааччыларын Сойууһун чилиэнэ, милиция подполковнига Май Прокопьевич Емельянов айымньылаах олоҕун уонна кини Күүстээх Соппуруон туһунан суруйуутун Дьаарханнааҕы Х. И. Хартасова-Терентьева аатынан куукула норуодунай тыйаатырын артыыстара (режиссер Линаида Терентьева) бэлэмнээбит биэриилэрин истэргитигэр ыҥырабыт.
