Ыам ыйын 29 күнүгэр Никииппэр Сэмиэнэп аатынан норуот айымньытын киинигэр Библиотека күнүн чэрчитинэн сылын аайы ыытыллар Бүтүн Россиятааҕы “Библионочь – 2023” ааҕыыны көҕүлүүр сыаллаах хамсааһын быйыл «Читаем все» диэн девиһинэн ыытылынна. Кинигэ бырааһынньыгын үөрүүлээх аһыллыытыгар “Малдьаҕар нэһилиэгэ” МТ Аҕа баһылыга Степанов А. А. эҕэрдэ тылын эттэ. Бастыҥ ааҕааччылар бэлиэтэннилэр. Ол курдук, оҕолорго “Бастыҥ ааҕааччы” аатын ылла Васильева Карина 2 кл. үөрэнээччитэ, “Бастыҥ ветеран ааҕааччы” аатын Андреева Мария Гаврильевна, “Бастыҥ ааҕааччы дьиэ кэргэн” аатын Егоровтар дьиэ кэргэттэрэ ыллылар. Бастын ааҕааччыларга оҕоҕо «Кэскил» хаһыат, Мария Гаврильевнаҕа «Кыым», дьиэ кэргэҥҥэ «Ньурба» хаһыакка сурунуулары бэлэх туттардыбыт.
«Библионочь» бастакы тэрээһининэн «Рисунки, несущие свет» диэн Малдьаҕар оскуолатын 5 кылааһын үөрэнээччитэ, Малыкайдааҕы искусство оскуолатын “Живопись” салаатын 3 кылааһын туйгун үөрэнээччитэ, Республикатааҕы уруһуй күрэхтэрин I, III степеннээх дипломана, Бүтүн Россиятааҕы III степеннээх лауреата Ангелина Тимофеева уруһуйдарын быыстапкатын сүрэхтэниитэ буолла. Оҕо дьоҕура идэлээх учууталга үөрэннэҕинэ талаана арыллар, сайдар кыахтанар. Ол курдук, Ангелина Малыкайдааҕы искусство оскуолатыгар үһүс сылын Капитонова Эльвира Григорьевнаҕа дьарыктанан, араас хайыскаҕа олус элбэх кэрэ уруһуйдарын быыстапкалаан дьон-сэргэ биһирэбилин ылыан ылла Онон Ангелина учууталыгар Эльвира Григорьевнаҕа Малдьаҕар нэһилиэгин аатыттан улахан махталбытын биллэрэбит. Ангелинаҕа быыстапкатын сүрэхтэниитинэн нэһилиэк Аҕа Баһылыга Степанов Александр Александрович уонна үөрэх дьылын түмүгүнэн кылааһын салайааччыта Евдокия Егоровна Егорова «Бастыҥ үөрэнээччи» буолбутунан эҕэрдэлээн туран грамота уонна бириис туттардылар.
Онтон “Библиотечный переполох” диэн квест-оонньууга оҕолор «Книгочеи» уонна «Мудрецы» диэн икки хамаандаларга арахсан, биэс станцияларынан сылдьан, араас сорудахтары толордулар. Хас биирдии станция тус-туһунан сорудахтарын толорон, кинигэ туһунан бэргэн этии биирдии-иккилии тылын ылан истилэр. Түмүккэ тылларын холбоон сааһылаан этиини таһаардылар: «Кинигэ–/билии-кѳрүү/ бараммат байҕала,/ ѳй-санаа/ уостубат кылаата». Барыта 25 оҕо кыттыыны ылла. Түмүккэ, I миэстэ «Книгочеи» хамаандата, II миэстэ «Мудрецы» хамаандата ыланнар бука бары минньигэһинэн, сертификаттарынан наҕараадаланнылар уонна «Библионочь-2023» диэн суруктаах тордунан күндүлэннилэр.
Алын кылаас оҕолорун ыккардыгар ааҕыыны көҕүлүүр сыаллаах “Открой рот” диэн Бүтүн россиятааҕы акция чэрчитинэн бастыыр иһин чемпионат буолла. Манна Васильева Карина – I м., Филиппова Чэмэлиинэ – II м., Саввинова Элина – III м., Филиппова Василена – III м. буоллулар.
«Үлэ киһини киэргэтэр» — диэн Россияҕа Уһуйааччы уонна Аҕа сүбэһит, Саха сиригэр Үлэ сылларыгар аналлаах хоһооннору дорҕоонноохтук ис хоһоонун биэрэн туран ааҕыыга күрэх буолла. Манна Иванова Т. В., Макарова В. А., Непомнящая А. А. үһүөн олус үчүгэйдик ааҕаннар бастакы миэстэни ыллылар.
Ол кэнниттэн, кинигэни билиһиннэрэр, кинигэҕэ интэриэһи тардар сыалтан 3 буктрейлер көрдөрүлүннэ. СӨ суруйааччыларын сойууһун чилиэнэ, Күндээдэ нэһилиэгин бочуоттаах олохтооҕо Дмитрий Пономарев – Дьолуолаах «Биһик» диэн сэһэнигэр Габышев-Варламов Борис оҥорбут буктрейлерин, ыаллыы сытар Малыкай нэһилиэгин Муз.школа директора Потапов Афанасий Дмитриевич оҥорбут А. Кулаковскай «Саха интеллигенциятыгар суругар», Малдьаҕар бибилэтиэкэтэ оҥорбут Антуан де Сент-Экзюпери «Маленький принц» остуоруйатыгар буктрейлердэри көрдүлэр.
Салҕыы «Ретро кафе» – диэн ааттаан улахан дьоҥҥо уостан түспэт ырыаларынан караоке буолла.
Ону сэргэ, кэлбит дьоҥҥо Надежда Михайловна Афанасьева узбекскай манты, Анна Александровна Непомнящая кумааҕыннан декоративнай сибэккилэри оҥорорго «Мастерская радости» мастер-класстары ыыттылар.
«Селфи с книгой» фотозона үлэлээтэ. Оҕолор да, улахан да дьон олус сэргэхсийэн, үөрэн-көтөн тарҕастылар.
Кинигэни ааҕыаҕыҥ, таптыаҕыҥ, харыстыаҕыҥ. Кини үгүс киhи билиитин, иэйиитин, сыратын, үлэтин иҥэринэн айылларын өрүү өйдүөҕүҥ! Уонна, оҕо кинигэҕэ убаныыта, ылларыыта төрөппүттэриттэн тутулуктааҕын өйдөөн туран, бэйэҕит эмиэ үгүстүк библиотекаҕа оҕолорбутугар аахпыт айымньыларын ис хоhоонун ырытыhан, кинигэ ааҕыытыгар интэриэстэрин көбүтүөҕүҥ! Кинигэҕэ таптал үйэ-саас тухары иҥтин, билии-сайдыы киэҥ суолугар сирдээтин!
Бүгүҥҥү тэрээһиҥҥэ барҕа махталбын биллэрэбит олохтоох дьаһалта Аҕа баһылыгар Степанов А. А., көмөлөспүт бука бары үтүө мааны дьоммутугар, кыттыбыт оҕолорбутугар. Эһигини кытта мэлдьи истиҥ сыһыан салалыннын, ситиһии эрэ сиэтистин, кэрэ эрэ кэккэлэстин!
ИВАНОВА Е. Н.
