14 сылын ыытыллар Бүтүн Россиятааҕы «Библионочь-2025» акция быйыл Аҕа дойдуну көмүскээччилэр уонна Улуу Кыайыы 80 сылыгар анаммыта. Бу акция чэрчитинэн Малдьаҕардааҕы Никииппэр Сэмиэнэп аатынан НАК-гэр араас тэрээһиннэр ыытылыннылар.
Ол курдук, Аҕа дойду сэриитин туһунан викторина, Кыайыыга кынаттаабыт ырыаларынан музыкальнай күрэхтэр буоллулар. Ыксаллаах кэмҥэ суһал көмөнү оҥорууга олохтоох ФАП сэбиэдиссэйэ Ньургууна Сергеевна Федорова маастар-кылаас биэрдэ.
Ол кэнниттэн, билиилэрин чиҥэтэн, араас сорудахтары биэрэн толоттордо, кыттааччылар ыйыытыыларыгар хоруйдаата. «Дьөһөгөй оҕотун бэлэҕэ» диэн сылгы сиэлин, кылын хайдах сууйарга, сүүмэхтээн кырыйан бэлэмнииргэ, кылтан утахтары оҥорорго, 6-8 утаҕынан өрөргө олус туһалаах маастар-кылаас буолла.
Бу маны Аҕа дойду сэриитин кыттыылааҕа, удьуор тойуксут, оһуокайдьыт Тимофеев Семен Николаевич кыыһа, Учууталлар учууталлара, СӨ үөрэҕириитин туйгуна, РФ үөрэҕириитин бочуоттаах үлэһитэ, СӨ педагог-наставнига, СӨ үөрэҕириитин бочуоттаах бэтэрээнэ — Юлия Семеновна Дьячковская олус үчүгэйдик үөрэтэн, махтал үтүө тылларын ылыан ылла. Кини кылтан-сиэлтэн араас оҥоһуктарын көрдөрүүгэ туруорбутун, бары сөҕө-махтайа көрдүбүт.
Хас биирдии кыттааччы «тымырдаайы» диэн төбөҕө кэтиллэри 8 утаҕынан өрөргө үөрэннилэр. Бу тэрээһин кыттыылаахтарыгар анаан фотозона оҥоһуллубута, итии чэйинэн, сылаас алаадьы бэлэмнэммитэ. Маастар кылаас ыытааччыларыгар улахан махталбытын биллэрдибит.
